Recent Posts

Breaking News

Pagtaas sa kaso sa Covid-19 sa Digos gika-alarma


DIGOS CITY -- Naalarma ang mga netizens dinhi sa dakbayan human paspas nga misipa ang ihap sa mga natakbuyan sa makamatay nga sakit nga coronavirus disease (Covid-19).

Subay sa abisong gipagawas sa City Health Office (CHO) Miyerkules sa hapon, Oktubre 7, anaa na sa 102 ang kompirmadong kaso sa dakbayan.

Misaka sab sa upat ang ihap sa mga namatay human nadugang ang laing duha nga padayon pang gisubay ang mga datos.

Sumala sa CHO nga 70 pa lang ang nakarekober sa maong ihap diin anaa na sa 28 ang gidala sa bay tambalanan.

Nadugangan pa og pito ka kompirmadong kaso sa Covid-19 sa dakbayan mao nga naalarma na ang mga netizens.

Gibutyag ni Jenelyn Rubin nga namatikdan nila nga daw gibalewala gihapon sa uban ang ka-delikado sa maong kagaw.

Napansin sab ni Joy Pinero nga daghang mga batan-on ang nagatapok sa internet cafe ug wa motuman sa social distancing.

Ang Digos City Police Station padayong nag-implementar sa "Oplan Pagatam" apan sagad sa mga nadakpan mao ang mga motorista sa kadalanan.

Samtang duna say mga netizens nga nag-away na sa ilang social media account gumikan sa di magkatugma nga baruganan.

Pipila kanila buot nga ibalik sa lockdown ang siyudad apan daghan ang nasuko sa maong opinyon sanglit maapektuhan ang kadaghanan ilabi na ang mga nanarbaho.

Na-obserbahan sab sa ubang netizens nga yano rang nagsuroy-suroy ang ubang mga molupyo sa dakbayan bisan way dalang quarantine ug work pass.

Samtang makita sa datos sa CHO nga 157 ang gipailawom sa strict home quarantine ug 20 ang anaa sa isolation unit. (Orlando B. Dinoy)


Source: Sun.Star Superbalita (https://www.sunstar.com.ph/article/1872755/Superbalita-Davao/Balita/Pagtaas-sa-kaso-sa-Covid-19-sa-Digos-gika-alarma?ref=rss&format=simple&link=link)

No comments