Recent Posts

Breaking News

P5.1-M shabu gipalusot ni lola


NASIKPAW sa mga awtoridad ang 67-anyos nga lola kinsa namaligya og shabu alas 5:00 sa hapon niadtong Sabado sa Dakbayan sa Cotabato.

Giila ang lola nga Sittie Omar Luman, minyo ug nagpuyo sa Barangay Nunangen, Datu Anggal Midtimbang, Maguindanao Province.

Sumala sa Philippine Drug Enforcement Agency (PDEA) sa Bangsamoro Autonomous Region in Muslim Mindana (Barmm) pinaagi ni Regional Director Juvinal Azurin nga nagpahigayon sila og drug buy-bust operation sa Barangay Rosary Heights 3 sa Dakbayan sa Cotabato, uban ang kapulisan.

Sa dihang akto na untang itunol ni lola ang shabu ngadto sa babayeng asset sa PDEA-Barmm, giambakan gilayon kini ug gisikop.

Narekober sa posisyon ni lola ang 750 gramos nga shabu nga nagkantidad og P5.1 milyon, mga drug paraphernalias ug mga personal nga kagamitan.

Gikanayon ni Azurin nga usa ka bulan nilang gipanid-an ug gibantayan si Luman una nadakpan.

Giingong nalambigit sa pagpamaligya og shabu ang lola sa Siyudad sa Cotabato ug Maguindanao Province ug posibleng dunay dakong grupo nga gikuhaan niini og suplay.

Ang suspek gibalhog na sa selda sa PDEA-Barmm ug gitakda nga pasakaan og kasong kalapasan sa Republic Act 9165 o Comprehensive Dangerous Drug Act of 2002.


Source: Sun.Star Superbalita (https://www.sunstar.com.ph/article/1873842/Superbalita-Davao/Balita/P51-M-shabu-gipalusot-ni-lola?ref=rss&format=simple&link=link)

No comments