Recent Posts

Breaking News

P150M nga balor sa shabu nasakmit sa Lapu-Lapu City


MOKABAT sa 22 kilos sa gituohang shabu nga dunay Dangerous Drugs Board (DDB) value nga P150 milyunes nasakmit sa kapulisan sa Dakbayan sa Lapu-Lapu ug Philippine Drug Enforcement Agency (PDEA) 7 mga alas 4:30 sa Miyerkules sa hapon, Oktubre 21, 2020 sa sityo Lawis, Barangay Suba Basbas, Dakbayan sa Lapu-Lapu.

Ang suspek nga nasikop sa buy-bust giilang si Gilbert Lumanog, 38, taga Barangay Poblacion, Pinamungajan, Cebu.

Matod ni Police Major Myla Maramag, hepe sa City Intelligence Unit (CIU) sa Lapu-Lapu City Police Office (LCPO) nga usa ka buwan nilang gi-monitor si Lumanog human sila makadawat og impormasyon gikan sa Camp Crame.

Ila kining gi-follow-up dinhi ug dihang nakompirmar human sa usa ka buwan nga pagpaniid, ilang gipahigayon ang operasyon.

Ang drugas giingong gikan sa sindikato nga naglihok sulod sa New Bilibid Prisons (NBP) sa Muntinlupa City.

Mao kini ang ikaduhang labing daghan nga illegal drugs nga nasakmit dinhi sa Sugbo sukad gihingusgan ang kampanya sa illegal drugs sa administrasyon ni Presidente Rodrigo Duterte.

Mas daghan ang 28 ka kilong shabu nga nasakmit sa Cebu City Police Office (CCPO) sa ilang duha ka mga buy-bust niadtong Marso 3, 2019 sa lungsod sa Consolacion.(BBT)


Source: Sun.Star Superbalita (https://www.sunstar.com.ph/article/1874194/Superbalita-Cebu/Balita/P150M-nga-balor-sa-shabu-nasakmit-sa-Lapu-Lapu-City?ref=rss&format=simple&link=link)

No comments