Recent Posts

Breaking News

P1.1M nga tseke giuli sa enforcer ngadto sa tag-iya


“HONESTY is the best policy.” Mao kini ang gituman sa usa ka traffic enforcer sa dakbayan sa Mandaue human niya giuli ang mga tseke nga nagbalor og P1.1 million nga nakit-an sa dalan.

Sa pagpakighinabi sa Superbalita Cebu ni Arnold Malig-on, operations head sa Traffic Enforcement Agency of Mandaue (Team), siya niingon nga niadtong hapon sa Oktubre 22, 2020, si Jose Feraniel Jr., traffic enforcer sa corner M.C. Briones St. ug M.D. Echavez St., Barangay Maguikay, samtang nag-atiman sa trapiko sa lugar, nakamatngon siya nga dunay mga papel nga naglupa-lupad sa dalan.

Human niya gipunit ang mga papel, nakita niya nga mga tseke kini hinungdan nga iyang gipangpunit ang 14 ka mga piraso.

Human sa iyang duty, dali kini niyang gi-turnover sa iyang field supervisor ug nakulbaan kini tungod sa kadako sa kantidad sa iyang napunitan.

Matod ni Malig-on nga usa sa ilang mga kawani sa Team nakaila sa tag-iya sa tseke hinungdan nga ila dayon kining gitawagan gabii sa Oktubre 22.

Sa ilang pagtawag, matod ni Malig-on nga murag naibtan og tunok ang tag-iya human nila gipahibawo nga anaa nila ang iyang mga tseke.

Sa pakighinabi sab ni Malig-on sa tag-iya, kinsang ngan gipugngan, kini nisulti nga sa oras nga nakit-an ni Feraniel ang mga tseke, paingon na siya sa ilang balay human siya nangolekta sa iyang mga kustomer.

Matod sa tag-iya nga gibutang ra niya sa iyang belt bag ang mga tseke ug pag-abot niya sa balay nahibong na siya nga wala na ang mga tseke.

Mapasalamaton ang tag-iya nga gitawagan siya sa Team.

Niadtong Biyernes, Oktubre 23, 2020, pormal nga gi-turnover ni Feraniel ang P1.1 million ngadto sa tag-iya.

Gikompirmar sa tag-iya nga ang 14 ka tseke mao ang nawala niya.

Wa sab magdahom og bisan unsang reward si Feraniel ug ang iyaha lang nga makaserbisyo siya nga tinud-anay.

Matod ni Malig-on nga kini nagpakita lang nga ang ilang mga traffic enforcer di lang epektibo sa pagdumala sa dagan sa trapiko, apan matinud-anon sab sila sa ilang trabaho.

Dugang ni Malig-on nga giimbitar si Feraniel ni Mandaue City Mayor Jonas Cortes sa iyang opisina karong Lunes, Oktubre 26, 2020.


Source: Sun.Star Superbalita (https://www.sunstar.com.ph/article/1874585/Superbalita-Cebu/Balita/P11M-nga-tseke-giuli-sa-enforcer-ngadto-sa-tag-iya?ref=rss&format=simple&link=link)

No comments