Recent Posts

Breaking News

Ngan karon sa kanhi basurahan: Mandaue City Dumpsite Eco-Park


ILISDAN na og pangalan ang Mandaue City Dumpsite Eco-park sa Barangay Umapad ngadto sa Mandaue City Green Learning Park human mipasar ang konseho og ordinansa.

Gipalabang na sa konseho ang ordinansa sa pag-ilis sa pangalan niadtong ika-66 nga regular nga sesyon niadtong Oktubre 21, 2020.

Si Konsehal Carmelino del Mar sa Dakbayan sa Mandaue nga nagsulat sa maong ordinansa, miingon nga gawas sa pagbag-o sa lugar, angay sab nga usbon nila ang pangalan sa lugar.

Kini usa sab sa pagsunod sa Republic Act 9003 nga naila usab nga Ecological Solid Waste Management Act of 2000, diin gidili na ang paghingalan sa lugar og “dumpsite”.

Sa ingon, gipahayag usab sa konseho ang katuyoan nga usbon ang pangalan pinaagi sa resolusyon No.15-732-2020 nga giulohan og “Resolution expressing intention to rename the Mandaue City Dumpsite Eco-park stipulated in the approve safe closure and rehabilitation plan (SCRP) into Mandaue City Green learning park”

Matod ni Del Mar, nganlan kini nila og Green Learning Park tungod usa kini ka integrated nga lugar diin mamahimong makat-on ang mga bisita sa mga methane gas management, urban gardening, composting, leachate management ug uban pa nga mga teknolohiya nga gipatuman sa rehabilitasyon sa lugar.

Kon mahuman na ang rehabilitasyon sa lugar, ablihan na kini sa publiko nga libre.

Gipaambit ni Del Mar nga kon matapos na ang pandemya, mamahimo nga mopahigayon og tour ang mga eskwelahan ngadto sa lugar aron makat-on ang mga estudyante labi na sa urban gardening ug composting.

Gani kon mobisita ang mga estudyante, makita nila ang kalahian niadtong dumpsite pa kini ug karon nga gihimo na kining park. (KFD)


Source: Sun.Star Superbalita (https://www.sunstar.com.ph/article/1874666/Superbalita-Cebu/Balita/Ngan-karon-sa-kanhi-basurahan-Mandaue-City-Dumpsite-Eco-Park?ref=rss&format=simple&link=link)

No comments