Recent Posts

Breaking News

Mibisita sa piniriso napriso kay 'misuburno' og P500 sa pulis


NIKUYOG ra unta sa silingan nga dunay bisitahon sa sulod sa prisohan sa dakbayan sa Talisay, apan lalake nabilanggo na hinuon human giingong gisuwayan og suburno og P500 ang pulis.

Ang lalake nanghangyo sa pulis nga pasudlon ang iyang silingan bisan kon gidili pa kini tungod sa hulga sa coronavirus disease (Covid-19).

Si Police Major Gerard Ace Pelare, hepe sa Talisay City Police Station, niingon nga wa na makagawas si Ricky Zapanta, 41, taga Zone 5, Barangay Biasong tungod sa paghatag og soborno sa pulis nga guard niadtong tungora.

Matod ni Pelare nga si Zapanta gidakop sa iyang sakop sa Huwebes sa udto, Oktubre 22, dihang miuban sa iyang silingan nga mobisita ra unta sulod sa selda. Apan tungod kay hangtud sa pagkakaron wala pay gitugtan nga makabisita sa mga napriso tungod sa Covid-19, wa kini tugoti.

Apan si Zapanta giingong nihangyo sa nag-duty nga pulis nga pasudlon kadiyot ang iyang silingan tungod kay duna lay importante nga tuyo dungan sa paghatag og P500.

Ang pulis nga gitanyagan, inay modawat, nidakop ug nipriso kang Lisondra tungod sa iyang kasuko sa gibuhat niini.

Ang nakauli mao na lang ang iyang silingan.

Si Patrolman Aries Araw-araw sa Talisay Police Station niingon nga si Zapanta gipasakaan og kasong attempted corruption of a public official nga usa ka kalapasan sa Article 210 ug 212 sa Revised Penal Code.

Kini dunay silot nga arresto mayor kun pagkabilanggo og usa ka buwan ngadto sa unom ka mga buwan kon mapalgang sad-an. Padayon siyang gibilanggo sa Talisay Police jail. (BBT)


Source: Sun.Star Superbalita (https://www.sunstar.com.ph/article/1874583/Superbalita-Cebu/Balita/Mibisita-sa-piniriso-napriso-kay-misuburno-og-P500-sa-pulis?ref=rss&format=simple&link=link)

No comments