Recent Posts

Breaking News

Mga piniriso sa 11 ka detention cell nagsinardinas


HEPE sa Cebu City Police Office mimando sa tanang 11 ka chief of police nga ipadali ang paghikay sa commitment order sa ilang mga piniriso kay naghuot na ang mga selda.

Giangkon ni Police Colonel Josefino Ligan nga naproblema sila sa kadaghan sa ilang persons under police custody sa 11 ka police stations.

Sa Mabolo Police Station lang, aduna na silay 42 ka mga binilanggo nga sobra na sa kapasidad nga 21. Posible kaayong magtinakdanay na sila sa ilang mga sakit kon pasagdan na lang.

Gimandoan ni Ligan ang mga chief of police nga ipadali ang pagproseso sa mga papeles aron ma commit na sa Cebu City Jail.

“Ang gihimo nato sa atong detention facilities karon, ang mga station commander they need to fast-track the processing of the commitment order para to de-congest sa mga piniriso. Ma remand dayon sila sa city jail,” matod ni Ligan.

NAAY PROBLEMA

Apan usa sa mga problema nga ilang giatubang nganong langay ang pagbalhin ngadto sa city jail sa mga dinakpan mao ang health protocol sama sa pagpaubos kanila sa Covid test.

Ang Bureau of Jail Management and Penology (BJMP) di modawat sa dinakpan kon way health record nga magpamatuod nga wa siya matakdi sa coronavirus disease (Covid-19).

Matod ni Police Brigadier General Albert Ignatius Ferro nga ilang pangitaan og paagi nga masulosyonan ang maong problema.

“Because we cannot really force the court or the BJMP nga magdawat sa atong mga preso if they have no RT-PCR result,” matod ni Ferro.

Aron malikayan ang maikyasan sa mga piniriso tungod sa kadaghan, gimandoan usab ni Ligan ang tanang mga hepe nga matag duha ka oras mohimog accounting sa mga binilanggo. (AYB)


Source: Sun.Star Superbalita (https://www.sunstar.com.ph/article/1874908/Superbalita-Cebu/Balita/Mga-piniriso-sa-11-ka-detention-cell-nagsinardinas?ref=rss&format=simple&link=link)

No comments