Recent Posts

Breaking News

Mga opisyal sa barangay sa Tabogon gidakop tungod sa SAP 'anomaly'


LAING mga opisyal na usab sa usa ka barangay sa Sugbo gipangdakop tungod sa giingong anomaliya sa special amelioration program (SAP).

Ang gidakop sa kapulisan sa lungsod sa Tabogon police sa lungsod sa Tabogon, amihanang Sugbo mga alas 6:30 sa buntag sa Martes, Oktubre 27, 2020 mao sila si Managase Barangay Captain Santiago Gulune Sollano, barangay councilor Ruthlene Sobredo Ybañez, chief tanod Nolito Ybañez, barangay health workers Noemi Bontia ug Jessa Ursal.

Sila gidakop nila ni Police Lieutenant Derrick R. Inot, acting chief of police, uban kanila ni Master Sergeant Steeve Book ug Police Corporal Benedict Benito pinasikad sa warrant of arrest nga giluwatan ni Judge Glenn Jumao-as sa Branch 81 sa Bogo City Regional Trial Court.

Kini tungod sa kasong paglapas sa Section 3 sa Republic Act (RA) 3019 kun Anti-Graft and Corrupt Practices Act.

Matod ni Book nga una nilang gidakop sa balay niiini mga alas 6:30 sa Martes sa buntag mao si Sollano dayon ilang gisunod ang ubang mga barangay official.

Malinawong ningkuyog kanila ang mga barangay official sa police station.

Ang korte nitugot og P90,000 nga pyansa matag usa kanila alang sa ilang temporaryong kagawasan.

Matod ni Book nga makatulog og usa ka gabii ang mga opisyal sa bilanggoan kay sa Miyerkules, Oktubre 28, pa sila mopyansa.

Sa Facebook post sa Tabogon police, dunay mga tawo nga giingong gibahinan sa SAP fund bisan kon wa kini sa listahan sa mga benepisaryo.

Ang SAP alang sa labing kabus nga mga lumolupyo nga apektado sa coronavirus disease (Covid-19).

Ikaduha na sila nga mga opisyal sa barangay sa Sugbo nga gipangdakop tungod sa SAP.

Sa miaging semana, gisipong pagdakop ang mga opisyal sa Barangay Tubod, Barili tungod gihapon sa giiingong anomaliya sa SAP.(AYB, GPL)


Source: Sun.Star Superbalita (https://www.sunstar.com.ph/article/1874843/Superbalita-Cebu/Balita/Mga-opisyal-sa-barangay-sa-Tabogon-gidakop-tungod-sa-SAP-anomaly?ref=rss&format=simple&link=link)

No comments