Recent Posts

Breaking News

Mga lungsod ug barangay gibaha


COTABATO CITY -- Gitahasan ni Datu Montawal Mayor Datu Otho Montawal sa Maguindanao Province si Municipal Disaster Risk Reduction and Management Office (MDRRMO) Officer Bal Kadiding subayon ang mga dapit nga giigo sa baha sugod niadtong Miyerkules.

Nakasinati og grabeng pagbaha ang 11 ka barangay sa Datu Montawal sa walay puas nga pag-ulan nga pinisik sa Bagyong Ofel.

Kini human miawas ang Pulangi River ug gibaha kadtong mga namuyo daplin sa suba ug ubos nga mga dapit.

Abtik nga milihok ang grupo ni Kadiding sa MDRRMO-Datu Montawal ug giluwas kadtong mga naipit sa baha.

Daghang kabalayan ang gilunopan ug minilyon nga damyos sa mga pananom nga gibanlas sa tubig.

Mga bakwit sa baha anaa na sa mga taas nga dapit sa Datu Montawal ug ang uban anaa kilid sa national highway ug gihatagan na og inisyal nga tabang sa lokal nga panggamhanan.

Gibaha sab ang lungsod sa Pagalungan ug daghan ang nanghikling daplin sa suba.

Apil nga gibahaan ang probinsiya sa Cotabato nga gilangkuban sa mga lungsod sa Pikit, M'lang, Tulunan ug Kabacan.

Padayon ang flood assessment sa PDRRMO sa probinsiya sa Maguindanao ug North Cotabato sa mga apektadong mga lungsod. (Edgar E. Fuerzas)


Source: Sun.Star Superbalita (https://www.sunstar.com.ph/article/1873551/Superbalita-Davao/Balita/Mga-lungsod-ug-barangay-gibaha?ref=rss&format=simple&link=link)

No comments