Recent Posts

Breaking News

Mga libud suroy sugdan og hipos


NING semanaha, kon naa man, gamay na lang unya nga mga libud suroy ang makit-an sa kadalanan sa Dakbayan sa Sugbo.

Kay karong adlawa, Biyernes, Oktubre 16, sugdan na sa mga awtoridad ang pagluwas sa mga libud suroy gikan sa kadalanan.

Ang kapulisan, uban ang Kagamhanan sa Siyudad sa Sugbo, Department of Social Welfare and Development (DSWD 7) lakip na ang Department of the Interior and Local Government (DILG 7), molusad og One-Time, Big-Time rescue operation batok sa mga street dweller aron malikay sila sa coronavirus disease 2019 (Covid-19).

Nipagawas og kamandoan ang DILG sa tanang lokal nga kagamhanan lukop nasud pagsulbad sa problema sa street dwellers kun mga tawo nga naa lang namuyo daplin sa kadalanan.

Tungod, niini matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO) nga ang ilang buhatan molusad og rescue operation sa maong mga tawo.

Ang ilang ma-rescue kasamtangan nga ipahimutang sa usa ka luna sa North Reclamation Area aron mahatagan silag pagkaon ug ayuda.

Matod ni Parilla nga ilhon dayon nila kinsa ang taga probinsya sa Sugbo aron iproseso ang ilang papeles alang sa pagpapauli kanila.

Sa samang higayon, hatagan og financial assistance ug makig-alayon sila local government unit (LGU) diin magagikan ang street dweller

Ipaubos una sila sa swab test aron pagsiguro nga wa silay Sars-CoV-2, kagaw nga nagdala sa Covid-19.

“As of now naay plano ang city hall nga i-process nani sila. Kadtong qualified nga mopauli sa ilahang probinsya, they will be provided with funds or enough nila ug i-coordinate sa ilang LGU nga makabalik sila,” matod ni Parilla.

Ipaubos sila sa monitoring ug kon mobalik sila sa pagpuyo sa daplin sa karsada o ilawom sa mga taytayan sa siyudad sa Sugbo ug madakpan sila pag balik, mahimong mag-atubang na silag kaso basi sa ordinansa nga anti-mendicancy.

Kadtong mga nagpuyo sa siyudad sa Sugbo ihatod sa mga barangay kon diin sila namuyo pinaagi sa abag sa mga barangay opisyal.

Nabantayan nga kining mga taga siyudad sa Sugbo nga nagpakilimos adunay tighatag kanilag pagkaon gikan sa mga non-government organization nga maoy hinungdan nga nanganad kini.

“So, ato na silang ibalik, atong i-coordinate sa ilang mga barangay. And then, the next time nga makita pa gihapon nato sila, there will be a data base now nga record for all those rescued nga mga mendicant and street dwellers. So, the second time around ug third time around nga ma rescue gihapon nato sila, they will be charged na,” dugang ni Parilla. (AYB)


Source: Sun.Star Superbalita (https://www.sunstar.com.ph/article/1873580/Superbalita-Cebu/Balita/Mga-libud-suroy-sugdan-og-hipos?ref=rss&format=simple&link=link)

No comments