Recent Posts

Breaking News

Mga ebidensya sulod sa prosecutor’s office gikawat


LAIN na usab nga buhatan sa kagamhanan sa Dakbayan sa Lapu-Lapu gilungkab sa wala mailhing kawatan sa Sabado, Oktubre 17, 2020.

Ning higayona ang gibiktima mao na usab ang Lapu-Lapu City Prosecutor’s Office nga nahimutang sa Lapu-Lapu City Hall of Justice.

Nahibaw-an ang hitabo sa Sabado dihang usa ka staff nibisita unta sa buhatan apan nakurat nga giguba na ang pultahan.

Matod ni Police Captain Alcon Escosura, officer-in-charge sa Police Station 3 sa Lapu-Lapu City Police Office (LCPO) nga base sa ilang inisyal nga imbestigasyon, posibleng nisulod ang kawatan sa kilid sa Hall of Justice compound.

Kini gumikan kay adunay gate sa dapit nga wa makandadohi.

Gawas niini, aduna usay habig sa compound nga adunay gihimong temporaryong lugar alang sa inquest nga gitabonan lang og plastic barrier diin mahimong makasuong o makakamang ang usa ka tawo.

Aduna untay duha ka gwardiya ang atubangang bahin sa compound, apan wala siguro kini makabantay sa pagsulod sa kawatan hilabi na kon ugaling wa sila mag roving.

Wala matinong balor sa kwarta ang nakuha sa kawatan apan giapil sa pagkuha ang mga pakete sa gituohang shabu ug armas de fuego nga mga ebidensya unta sa mga kaso.

Gikatakdang susihon pa sa kapulisan ang cellphone ni Fiscal Ruso Zaragosa sanglit konektado ang CCTV footage sa iyang buhatan sa iyang cellphone alang sa pag-ila sa nanglungkab.

Mao na kini ang ikaupat nga buhatan ubos sa Kagamhanan sa Dakbayan ang gilungkab sulod lang sa kapin sa tulo ka semana.

“Dili ra usa ang suspect ani nga mga incident para sa amoa kay katong sa City Registrar, inside job gyud to. Kani kawatan gyud ni kay naa may forceed entry. Ang target lang pud kay mga evidence,” pagpasabot ni Escosura.


Source: Sun.Star Superbalita (https://www.sunstar.com.ph/article/1873817/Superbalita-Cebu/Balita/Mga-ebidensya-sulod-sa-prosecutors-office-gikawat?ref=rss&format=simple&link=link)

No comments