Recent Posts

Breaking News

Mga anomaliya sa kagamhanan ipaimbestigar ni Duterte


SI PRESIDENTE Rodrigo Duterte nipalapad sa responsibilidad sa inter-agency task force against corruption nga gipangulohan ni Justice Secretary Menardo Guevarra nunot sa iyang pagmando sa pag-imbestigar sa mga anomaliya sa tanang mga ahensya sa kagamhanan.

Si Duterte niingon nga makapaabot sa di madugay ang sad-ang mga opisyal sa ilang suspensyon.

“Ang focus ko ngayon the Office of the President itself will be against corruption so in the coming days, expect suspension,” si Duterte niingon sa iyang recorded nga pagpamulong sa publiko sa Martes sa buntag, Oktubre 27, 2020.

Matod ni Duterte nga naa na sa task force ang paghukom kon unsa nga alegasyon ang imbestigahon ug kinsa kadtong pasakaan og kaso base sa gibug-aton ug epekto sa paghatag sa serbisyo ngadto sa publiko.

Ang imbestigasyon magpadayon hangtod sa pagkapupos sa termino ni Duterte sa Hunyo 30, 2020 gawas kon dunay mando ang Presidente.

Si Duterte nihisgot sa panginahanglan sa pag-imbestigar sa kurapsyon sa Department of Public Works and Highways (DPWH). Iyang gitataw nga wa siyay reklamo kang Secretary Mark Villar kay kay daghan kini og mga nahimo.

“But you know accomplishments alone to me should not suffice para na sa akin, hindi na kay Secretary Villar, because it’s not his job to be running after crooks,” siya niingon.

“But it behooves upon me to see to it na itong corruption mahinto or at least maputol nang konti. I will order your suspension. I need not go to court. Huwag ninyo akong lokohin,” siya nidugang.

Si Villar nihulma og internal anti-corruption unit aron pagsusi sa balidong taho sa kurapsyon nga naglambigit sa pipila ka mga opisyal sa departamento ug personnel.

Si Duterte nitukod sa task force pinangulohan sa Department of Justice (DOJ) sa Agusto aron pagpahigayon sa imbestigasyon sa mga alegasyon sa kurapsyon sa Philippine Health Insurance Corporation (PhilHealth), labina sa pagpatuman sa interim reimbursement mechanism.

Ang task force, pinaagi sa National Bureau of Investigation, nipasaka og kasong malversation ug graft charges batok kang kanhi Philhealth president Ricardo Morales ug daghan pang tag-as nga mga opisyal sa ahensya sa giingong mga iregularidad sa ahensya tungod sa giingong mga iregularidad.

Si Duterte niingon nga 40 ka senyor nga mga opisyal sa Philhealth nipili sa pag-resign gikan sa ilang mga posisyon taliwa sa pagpahigayon sa imbestigasyon sa ahensya. Matod sa Presidente nga ang ilang resignasyon di makaluwas kanila gikan sa ilang mga tulubagon.

“Let me remind everybody in this government. Your resignation will not save your neck. You are not allowed to resign to escape liability,” siya niingon. (SunStar Philippines)


Source: Sun.Star Superbalita (https://www.sunstar.com.ph/article/1874909/Superbalita-Cebu/Balita/Mga-anomaliya-sa-kagamhanan-ipaimbestigar-ni-Duterte?ref=rss&format=simple&link=link)

No comments