Recent Posts

Breaking News

Mas palabihon nga sa karsada sa siyudad sila mamuyo


NAA tuod sila magpakabuhi sa mga karsada sa Dakbayan sa Sugbo, apan mas palabihon nilang way atop nga kapasilungan panahon sa kainit ug pagbunok sa uwan kay sa mouli sa ilang gigikanang dapit nga wa silay kapanginabuhian.

Sa laktod, lunosan sila sa gutom.

Si James (dili niya tinuod nga ngalan), 17-anyos, taga Barangay Cantabaco, Siyudad sa Toledo uban sa iyang live in partner nga usa usab ka menor nga nagkugos pa sa ilang anak, nagdumili sa pagpauli sa ilang lugar.

Alang kaniya, mas dunay kahigayunang mabuhi ang iyang partner ug anak kay sa mopauli sila sa Toledo City.

Pagpangarga sa Carbon market ang iyang panginabuhian. Mokita siyag P700 matag adlaw nga sarang na nga makapalit og gatas alang sa iyang anak.

“Dili ko mopuyo didto kay gagmay kaayo ang kita sa Toledo. Makaagi lang kag P50 hangtod P100. Unsa may ipalit nako sa diaper sa akong anak ug gatas ana?,” matod ni James.

Lakip sa na-rescue mao si Serlita Ejolin, 72, taga dakbayan sa Danao, nga nanginabuhi na dinhi sa siyudad sa Sugbo sulod sa 15 ka tuig.

Matod niya nga sukad nga nitaliwan ang iyang bana ug tungod sa kalisod, natukmod siya nga manimpalad sa dakbayan sa Sugbo.

“Lisod na kaayo ipauli sa amo kay wala man koy makwarta didto para sa akong pagkaon ug medisina,” matod ni Ejolin.

152 ‘GI-RESCUE’

Ang 152 ka mga libud suroy nga na-rescue gihatod sa Plaza Independencia ug gipakaligo, gitupihan ug dayong paubos kanila sa profiling sa anti-mendicancy department.

Ang nipahigayon sa operasyon mao ang mga sakop sa Prevention, Restoration, Order, Beautification and Enhancement (PROBE) team, kapulisan sa Siyudad sa Sugbo, City Social Welfare and Services ug Cebu City Medical Center (CCMC) atol sa One-Time, Big-Time rescue operation sa Biyernes, Oktobre 16, 2020.

Kini nunot sa kamandoan sa Department of the Interior and Local Government sa tanang local government units sa paghawan sa kadalanan gikan sa mga makililimos, manaygonay ug mga namuyo. / AYB

Atol sa pagsugod sa rescue operation, nangaukay ang mga namuyo sa bay walk sa South Road Properties (SRP) sa pagtuo nga dakpon na sila sa kapulisan ug Probe team.

Ang uban kanila nagdumili sa pag kuyog ilabi na nga adunay gagmay pa nga mga bata nga naa lang nangatulog sa daplin sa karsada.

Matod ni Raquel Bohol-Arce, pangulo sa Probe team, nga kinahanglan sila nga ipa check up sa mga doctor aron masuta kon wala ba silay mga sakit.

Samtang ang DSWS ang moila kon unsa nga programa nga ihatag sa matag usa kanila.

Kong ang na rescue taga probinsya, iproseso kini alang sa Balik Probinsya program.

Kon taga siyudad sa Sugbo, ila kining ihatod kon asa nga barangay nagpuyo.

“Ihatod, i-turnover nato sa mga barangay. Unya ang mga GAD focals maoy mo take care or see to it nga dili nana mobalik,” matod ni Arce.

Giangkon ni Police Colonel Josefino Ligan, officer-in-charge sa Cebu City Police Office, nga ang Dakbayan sa Sugbo maoy ilang gisaligan sa ilang pangwarta alang sa ilang pamilya.

Kon pasagdan lamang kini, dili masulbad ang problema sa mga libud suroy nga pamilya./AYB


Source: Sun.Star Superbalita (https://www.sunstar.com.ph/article/1873737/Superbalita-Cebu/Balita/Mas-palabihon-nga-sa-karsada-sa-siyudad-sila-mamuyo?ref=rss&format=simple&link=link)

No comments