Recent Posts

Breaking News

Mangingihaw og baboy gipatay sa kabanay nga gikasukmagay


MANGIHAWAY og baboy namatay diha-diha human giluba samtang nahinanok sa pagkatulog alas 5 sa buntag sa Biyernes, Okt. 9 sa Barangay Poblacion East, Moalboal, Sugbo.

Si Michael Fuentes, 33, mangihaway og baboy, namatay human nakaangkon og dakong samad sa tiyan.

Nadakpan sa follow-up operation sa kapulisan ang suspek nga si Alejandro Redoble, 55, minyo, mangihaway sab og baboy, kabanay sa biktima.

Si Police Senior Master Sergeant Stewart Bayang, imbestigador sa Moalboal Police Station nga nahinabi sa Superbalita Cebu, nagkanayon nga sila si Fuentes ug Redoble nag-ihaw og baboy uban sa ilang mga kabanay kay mag-letson sila sa birthday sa anak sa ilang kabanay.

Nianang kaadlawon samtang nag-ihaw, nagkalingaw sab silag tagay, pawala sa duka.

Pagka-alas 4 sa kaadlawon, nahubog si Fuentes dihang sila nagpasingitay og estorya.

Nahitabo ang sukmagay ug nibutoy ang walang kilay ni Redoble nga naigo sa sukmag ni Fuentes.

Si Fuentes gibitad sa iyang asawa, gipapauli sa ilang balay.

Gumikan kay nahubog na, wala mosulod sa ilang balay si Fuentes, diha sa lantay nga kawayan sa gawas sa balay natulog.

“Gipaabot daw ani niya nga matulog ang biktima. Miangkon siya kay pwerti niyang lagota dihang nahuboy iyang agtang naigo sa kumo,” dugang ni Bayang.

Sa paghinanok ni Fuentes, iya kining giduol ug gihansakan niya ang tiyan sa iyang dala nga kutsilyo dayon gilubag, hinungdan sa pagkahabwa sa ginhawaan sa biktima.

Giusban sab niya pagdunggab sa walang bahin sa ilok ug pulso aron pagseguro nga mamatay.

Human sa kremin, nipauli si Redoble sa ilang balay, apan ang asawa ni Fuentes nakamata dihang nadungog niya ang kusog nga agolo sa iyang bana.

Sa paggawas niya, iyang nakit-an si Redoble nga nagsigeg duslak sa iyang bana. Nakuha sa kapulisan ang kutsilyo nga dunay gitas-ong 12 inches.

Kasong murder ang giandam sa kapulisan nga ipasaka batok kang Fuentes. (GPL)


Source: Sun.Star Superbalita (https://www.sunstar.com.ph/article/1873048/Superbalita-Cebu/Balita/Mangingihaw-og-baboy-gipatay-sa-kabanay-nga-gikasukmagay?ref=rss&format=simple&link=link)

No comments