Recent Posts

Breaking News

Manager gipatay


COTABATO CITY -- Nakabsan sa kinabuhi ang usa ka store manager samtang samaran ang 12 anyos sa nahitabong pagpamusil alas 7:25 sa gabii, Miyerkules, Oktubre 21, sa siyudad.

Giila ang napatay nga si Glenda Ardonio, 39, manager sa Infinitea Restaurant ug nagpuyo sa Barangay Rosary Heights 7 sa nahisgutang siyudad.

Matud ni Cotabato City Police Station 2 Commander Captain Rustom Pastolero nga pasulod na unta ang biktima sa restawran nga nahimutang sa Sinsuat Avenue sa dakbayan sa dihang kalit mibutho ang usa ka wala mailhing lalaki ug gipusil siya gamit ang kalibre .45 nga pistola.

Abtik nga miikyas ang suspek sakay sa motorsiklo paingon sa hilit nga dapit sa siyudad samtang mga biktima gisapupo sa mga nagrespondeng mga pulis ug gihatud ngadto sa Cotabato Regional and Medical Center.

Apan gideklara si Ardonio nga namatay human ang usa ka oras human makaangkon og duha ka samad pinusilan sa lawas samtang luwas na ang bata nga dunay igo sa bala sa iyang tiil.

Blangko pa ang kapulisan sa siyudad apan padayon ang ilang pagsubay sa krimen aron matumbok ang nagpaluyo niini. (Edgar E. Fuerzas)


Source: Sun.Star Superbalita (https://www.sunstar.com.ph/article/1874309/Superbalita-Davao/Balita/Manager-gipatay?ref=rss&format=simple&link=link)

No comments