Recent Posts

Breaking News

Maestra naghikog, patay


DULAG, Leyte -- Wala nay kinabuhi nga naabtan sa iyang bana ang usa ka maestra human kini naghikog gamit ang pisi sulod sa ilang panimalay sa Barangay San Vicente, Dulag Leyte.

Ang patayng lawas nadiskubrehan sa iyang bana ilawom sa hagdanan sa ilang balay, alas 6 sa buntag, Biyernes, Oktubre 16, 2020.

Ang biktima gitago lang sa pangan nga Veronica, 47, usa ka elementary school teacher.

Base sa report sa kapulisan sa Dulag, nakadawat sila og impormasyon gikan sa Dulag Rescue Unit (DRU) bahin sa nahitabo nga paghikog sa maong lugar.

Ang kapulisan pinangulohan ni Police Master Sergeant Joselito Buhay dali nga miresponde sa lugar aron susihon kung unsa ka tinuod ang insidente.

Naabtan sa kapulisan ang patayng lawas sa biktima nga nagbitay ilawom sa hagdan sa balay diin ang bana niini nga usa ka high school teacher ang nakadiskubre.

Matod sa bana sa dihang nakaistorya sa mga imbestigador, duha nila ka anak ang nag positibo sa Covid-19 base sa RT-PCR result.

Sa pagkahibawo sa biktima, nakasinati kini og depresyon ug duha ka gabie nga walay saktong tulog ug wa nila damha nga maghikog kini.

Ang biktima gideklara nga patay na ni Dr. Allan Alvarez, municipal health officer sa Dulag.

Walay nakita nga foul play ang kapulisan sa kamatayon sa biktima apan padayon ang gihimo nga imbestigasyon sa insidente.


Source: Sun.Star Superbalita (https://www.sunstar.com.ph/article/1873759/Superbalita-Cebu/Balita/Maestra-naghikog-patay?ref=rss&format=simple&link=link)

No comments