Recent Posts

Breaking News

Laing senior citizen namatay sa sunog


Lain na sab nga senior citizen ang namatay sa laing sunog nga niigo sa Dakbayan sa Sugbo sud sa 24 oras.

Paig na ang lawas ni Emma Cubillan, 69, dihang nakaplagan sa mga bombero sa ikaduhang andana sa ilang balay human sa pagkombate sa kayo mga pasado alas 11 sa Lunes sa gabii, Oktubre 5, 2020 sa dan RR Landon, Barangay San Antonio, Dakbayan sa Sugbo.

Ang iyang bana nga si Angelito gidala sa usa ka pribadong tambalanan, apan sa pagsuwat ning balita, wa pa mahibaw-i unsa ang kahimtang.

“Ato ni siyang (Emma) napalgan sa 2nd floor, duol na sa hagdanan. Nagdinaganay ni sila, natumba ni siya,” matod ni Navarro.

Si FO2 Fulbert Navarro, imbestigador sa Cebu City Fire Department, nisulti sa Superbalita Cebu nga ilang nadawat ang alarma mga alas 11:13 sa Lunes sa gabii.

Ilang giisa sa 2nd alarm sa mga alas 11:25 ang sunog nga niugdaw sa upat ka mga balay.

Matod ni Navarro nga ang sunog nagsugod sa balay sa usa ka Grace Go, apan wa pa nila mahibaw-i kon unsay hinungdan sa sunog.

Ang sunog nibilin og P10.1 milyunes nga danyos.

Si Barangay Kapitan Daido Abcede Jr. niingon nga 15 ka mga pamilya ang apektado sa sunog, apan di siya makabana-bana kon pila ka mga tawo kay dunay mga boarder nga apektado.

Si Abcede niingon nga kasagaran sa mga biktima duna ray kabanay nga naa sa duol nagpuyo ug adto sila manghikling.

“Amo nang gisuroy ganiha ang mga victim, naa ba silay ka stay-han for the night,” matod ni Abcede.

Niadtong Dominggo sa gabii, Oktubre 4, duha ka mga senior citizen nga babaye, 80 ug 71 anyos, nangamatay sa sunog sa Barangay Sambag 1, Dakbayan sa Sugbo. BBT


Source: Sun.Star Superbalita (https://www.sunstar.com.ph/article/1872505/Superbalita-Cebu/Balita/Laing-senior-citizen-namatay-sa-sunog?ref=rss&format=simple&link=link)

No comments