Recent Posts

Breaking News

Kupon gikinahanglan sa pagduaw sa sam-ang


NAKAUYON ra si Lapu-Lapu City Mayor Junard Chan sa kahapsay sa pagduaw sa mga Oponganon sa mga pampubliko ug pribadong sam-ang sa dakbayan sa adlaw nga gitugotan sila ubos sa iyang executive order (EO).

Walay nakitang panaghuot sa mga tawo sa mga sam-ang ang mayor dihang suprisang kining milibot sa labing dakong sam-ang nga mao ang Humay-Humay sa Barangay Gun-ob.

Iyang gidayeg ang mga kapulisan ug force multiplier sa hugot nga pagpatuman gitaganang kapasidad sa mga sam-ang.

Oktubre 28 maoy katapusang adlaw sa mga Oponganon nga makabisita sa mga pampubliko ug pribadong sam-ang sa Lapu-Lapu.

Kini human nga Oktubre 29 hangtod sa Nobyembre 4 sirad-an man kini base sa kamandoan sa Inter Agency Task Force IATF ug ni Presidente Rodrigo Duterte.

Sa Nobyembre 5 na mahimong makabalik pagduaw ang mga Oponganon sa mga sam-ang.

Gibutyag sa mayor nga alang niadtong ganahan mobisita sa ilang mitaliwan nga mahal sa kinabuhi sa Catholic Cemetery kinahanglan una mokuha og entrance coupon sa kombento sa Nuestra SeƱora Virgen De La Regla sa dili pa sila tugotang makasulod sa menteryo.

Sa uban sama sa Mactan Island Memorial Garden, Heaven of Peace Memorial Garden, Menteryo sa Olango ug Protestant’s cemetery gipaagi kini sa alphabetical order sa mga management sa menteryo.

Nabantayan hinuon sa mayor nga ang mga tawo sa sulod sa mga sam-ang nakontrolar sa mga nagbantay apan ang mga tawo sa gawas maoy sagad bantayanan hilabi na sa katapusang adlaw gumikan kay dili kalikayan nga magtapok kini ug dili na hinuon masunod ang physical ug social distancing.

“Dako nakong pasalamat kanila sa ilang pagsuporta sa atong panawagan mahitungod sa atong pagbisita sa mga minahal sa kinabuhi nga mipanaw..” matod ni Chan. (GCM)


Source: Sun.Star Superbalita (https://www.sunstar.com.ph/article/1874977/Superbalita-Cebu/Balita/Kupon-gikinahanglan-sa-pagduaw-sa-sam-ang?ref=rss&format=simple&link=link)

No comments