Recent Posts

Breaking News

Kawat misiaw resulta sa pandemiya?


PADUGANGAN ni Lapu-Lapu City Mayor Junard “Ahong” Chan og mga closed circuit television CCTV ug security personnel ang palibot sa Lapu-Lapu City Hall hilabi na panahon sa kagabhion.

Kini nunot sa sunod-sunod nga pagpanglungkab sa mga buhatan sa city hall sa milabayng walo ka adlaw.

Unang gilungkab sa wa pa mailhing kawatan ang buhatan sa City Social Welfare and Development Office (CSWDO) niadtong Septiyembre 25 diin moabot P600 nga salapi, mga laptop ug cellphone ang nakuha.

Laing pagpanglungkab niadtong Oktubre 3 sa mga buhatan sa City Health Office (CHO) diin moabot sa kapin P30,000 nga cash ang nakuha sa kinatibuk-an apan ang mga gadget sama sa cellphone ug laptop ang wala hilabti. Dako ang pagtuo ni Chan nga nakatampo sa hitabo ang pandemiya ilabi nga daghan ang grabeng naapektuhan.

“Kabalo ta nga tungod sa kalisod, tungod sa pandemya, we were expecting nga moabot gyud sa punto mapunta gyud sa kawat,” matod sa mayor.

Ang duha ka buhatan nga gipanglungkab nabuwag sa main building sa city hall.

Dako usab ang pagtuo sa mayor nga usa ra ka grupo o ba kaha indibidwal ang milungkab sa duha ka buhatan. Dako ang posibilidad nga naka-amgo ang mga kawatan unsa kalisod ang pagbaligya sa mga gadget nga nakuha sa CSWDO hinungdan nga salapi gayud ang ilang gisiguro sa paglungkab sa CHO.

Gisalig na lang sa mayor ang pagsikop sa sa mga responsable sa naasoyng krimen ngadto sa kapulisan nga nihimo na og imbestigasyon sa hitabo.

Gibutyag sa mayor nga apil sa Supplemental Budget nga iyang gipangayo mao ang pagpamalit og dugang CCTV camera alang sa mga buhatan nga wala pa niini sama sa CSWDO ug CHO.

“We will also reinforce security detail para sa pang gabii,” dugang ni Chan. (GCM)


Source: Sun.Star Superbalita (https://www.sunstar.com.ph/article/1872560/Superbalita-Cebu/Balita/Kawat-misiaw-resulta-sa-pandemiya?ref=rss&format=simple&link=link)

No comments