Recent Posts

Breaking News

Kanhi OFW nadakpan sa buy-bust; supplier taga jail


Kanhi Overseas Filipino Worker (OFW) nga nagtrabaho sa Qatar isip laborer nadakpan sa buy-bust sa mga sakop sa City Intelligence Unit sa Cebu City Police Office alas 7:40 Domingo sa gabii, Oktubre 4, 2020 sa sitio Camansi, Barangay Mabolo, Siyudad sa Sugbo.

Ang nadakpan mao si Noel Navarro Oring, alyas “Jojo”, 32 , minyo, nagpuyo ra usab sa lugar, apan lumad nga taga Misamis Occidental.

Nakuha gikan kang Oring ang pinaketeng gituohang shabu nga motimbang 60 gramos nga mokantidad ogP408,000.

Matod ni Police Major Randy Caballes, hepe sa CIU sa CCPO, nga gipaubos nila sa duha ka mga semana nga surveillance si Oring human sila makadawat og report nga namaligya og illegal nga drugas.

Matod ni Oring ngadto sa mga pulis nga duha ka tuig nga OFW si Oring ug niadtong 2019 niuli kini sa Cebu sa dihang natapos ang iyang kontrata.

Apan nahurot ang iyang kinitaan sa panarbaho sa gawas ug nisamot ang kalisod sa dihang wa na siya makatrabahog balik tungod sa Covid 19.

Dugang ni Oring nga aduna siyay nakaila nga usa ka drug pusher nga giila nga si alyas “Kano” nga maoy niagni kaniya nga mobaligya sa illegal nga drugas.

Gibutyag ni Oring nga ang iyang contact naa sa sulod sa Cebu City Jail nga mao usab ang mo supply kaniya sa illegal nga drugas.

Naa nay ngalan ang kapulisan kon kinsa nga drug personality sulod sa bilanggoan nga maoy manawag kaniya labot sa ipadala nga supply sa illegal nga drugas. (AYB)


Source: Sun.Star Superbalita (https://www.sunstar.com.ph/article/1872387/Superbalita-Cebu/Balita/Kanhi-OFW-nadakpan-sa-buy-bust-supplier-taga-jail?ref=rss&format=simple&link=link)

No comments