Recent Posts

Breaking News

Imbestigasyon, kiha magpadayon; PSH nanghimakak nanikas


Pag-imbestigar ug pagpasaka og kaso sa National Bureau of Investigation (NBI) 7 sa giingong pagpanikas sa Covid-19 claims binagsa.

Bisan kon sila nakapasaka na og mga reklamo batok sa mga opisyal ug kawani sa Philippine Health Insurance Corp. sa Central Visayas (Philhealth 7) ug usa ka pribadong ospital sa Dakbayan sa Sugbo, nagsusi pa sila sa dugang benefit claims gikan sa mga pasyente sa coronavirus disease (Covid-19) cases.

Matod ni NBI 7 Regional Director Renan Augustus Oliva nga ilang imbestigahon ang tanang Covid-19 claims sa rehiyon sumala sa mando ni Presidente Rodrigo Duterte.

“The thrust of our investigation is per case, per patient. So, we go per patient sa claims. I-check namo if the claim was regular in a sense that it is complete with documents. Kon gi-claim na tanan as Covid, tagsa-tagsaon na namo,” matod niya.

Si Oliva niingon nga di nila matingob ang pagpasaka og kaso tungod sa kadaghanon sa mga dokumento nga ilang tan-awon og maayo sama sa pagkuhag medical interpretations, o mga opinyon gikan sa medico legal officers nga makatabang kanila sa pagpadayon sa imbestigasyon.

“It will take a little time before mahuman namo ang usa ka case. Sige lang. We are working on it,” siya nidugang.

NANGHIMAKAK

Ang Perpetual Succour Hospital (PSH) nanghimakak sa alegasyon nga nalambigit sila sa pagpanglimbong nga may kalambigitan sa Covid-19 Philhealth benefit claims.

Sa usa ka pamahayag nga gipadala sa SunStar Cebu sa Biyernes, Oktubre 30, 2020, ang PSH niingon nga sila “strongly confident (masaligon kaayo)” nga ang claim alang sa pasyente nga usa sa mga kaso nga giimbestigar sa National Bureau of Investigation (NBI) 7 way gitagoan ug kini “based on medical diagnosis of competent and respected medical professionals (gibase sa medikal nga paghiling sa takus ug tinahod nga medical professionals).”

“The claim was supported by medical records submitted to PhilHealth and passed scrutiny and applicable criteria set by PhilHealth,” matod sa tipik sa ilang official statement.

Ang NBI 7 nipasaka og daghang mga kaso niadtong Oktubre 29 batok sa walo ka rehiyonal nga mga opisyal sa Philippine Health Insurance Corporation (Philhealth) 7 ug upat ka mga opisyal sa PSH sa Dakbayan sa Sugbo tungod sa giingong kalambigitan sa anomalusong claims sa Covid-19 benefit.

Giingon sa reklamo nga ang pasyente negatibo sa coronavirus disease (Covid-19) base sa resulta sa PCR test, apan gi-claim nga nasakit og Covid-19 bisan kon yanong pneumonia ang namatyan.

Matod sa PSH nga kon ang complaint i-serve ug madawat na sa hingtungdan nga FMS personnel sa PSH, moduso sila og detalyadong kamatuoran ug legal nga tubag nga pamahayag luwatan ug iduso ngadto sa Office of the Ombudsman Visayas.

Kini magmatuod sa ilang ka walay sala ug way pagpanglimbong ug dautang katuyoan sa pag-andam ug pagduso sa Philhealth claim alang kang Patient X.

Kini nidugang nga ang NBI way nakitang rason o basihanan sa pagkiha sa medical professionals nga maoy ninghiling.

Ngano nga ang FMS personnel kinsa matinud-anon nga ni-file sa claims base sa paghiling og medical records mao may pasanginlan sa pagpanglimbong? Pangutana ni manlalaban Jose Ray Bael, abogado sa PSH.

Dugang pa, ang PSH niingon nga “unfortunate (alaot)” nga ang NBI 7 nituyo sa pahibawong pampubliko sa pagpasaka og mga kaso batok sa upat ka mga opisyal sa PSH ug personnel tungod sa giingong malimbungon nga claim sa

Philhealth bisan wa pa sila hatagi og kopya sa giingong complaint ug hatagan og kahigayunang makatubag.

Ang publikong pagpahibawo pinaagi sa tradisyunal ug social media nakapakugang sa PSH community, matod niya./ WBS


Source: Sun.Star Superbalita (https://www.sunstar.com.ph/article/1875243/Superbalita-Cebu/Balita/Imbestigasyon-kiha-magpadayon-PSH-nanghimakak-nanikas?ref=rss&format=simple&link=link)

No comments