Recent Posts

Breaking News

High profile inmates sa Cebu City Jail gipang-monitor


KAPIN sa 30 ka high profile inmates sa Cebu City Jail hugot nga gi-monitor sa jail officers kay gidudahan sila nga nagpadayon sa ilang ilegal nga negosyo sa gawas pinaagi sa pag-contact sa ilang mga drug dealer.

Si Jail Superintendent Julius Arro, jail warden sa Cebu City Jail, nagkanayon nga gipang isolate ang drug personalties ug wa giipon sa ordinaryong person deprived of liberty (PDL) kun piniriso. Ang mga high profile, matod ni Arro, nalambigit sa mga dinagko nga pagpayuhot sa ilegal nga drugas sa gawas.

Giangkon niya nga ang maong mga inmate modiktar sa ilang transaction sa gawas alang sa supply sa drugas.

“Kana nga mga drug personalities subject for monitoring. Actually, we have a lot of cooperation sa mga prior pa, inig meeting namo ni CD (City Director), may mga previous collaboration ang among gihimo with PDEA and then sa PDEG (Police Drug Enforcement Group),” matod ni Arro.

Human nigawas usab ang ngalan ni alyas “Jao” nga maoy contact sa duha ka high value individual sa Fatima Homes, Barangay Inayawan, Siyudad sa Sugbo nga nakuhaan og unom ka kilo sa shabu, iya dayon kining gipatawag.

Ang alyas Jao giila nga si Jesus Singson nga adunay kasong murder. Giingong mihimakak si Jao nga aduna siyay kalambigitan sa ilegal nga drugas sanglit ang kaso nga iyang giatubang murder man.

Giangkon ni Arro nga sukad pa kaniadto nga di pa siya ang nagdumala sa bilanggoan sa dakbayan sa Sugbo, ila nang problema ang pagpalusot sa mga kontrabando, usa na niini ang cellphones.

Sa miaging tuig, gilusad nila uban ang kapulisan ug Philippine Drug Enforcement Agency ang kinalit nga greyhound operation, diin liboan ka mga telepono ang ilang nasakmit apan naundang karong tuiga tungod sa Covid 19.

“Ang mga courier nato una kining mobisita. Ikaduha, kanang naga pasulod og goods sa amoa, driver, mga pahinante ug katulo, which is dili na ko magpahipokrito pa, of course, kining mga personnel namo nga siguro nasilaw, na tempt, nag facilitate pagdala sa cellphone,” dugang ni Arro.

Dugay na usab nga panahon ang tinguha sa Kagamhanan sa Dakbayan sa sugbo nga magbutang og signal jammer sa sulod sa bilanggoan apan wa matigayon tungod sa kadaghan usab sa giuna nga proyekto.


Source: Sun.Star Superbalita (https://www.sunstar.com.ph/article/1872550/Superbalita-Cebu/Balita/High-profile-inmates-sa-Cebu-City-Jail-gipang-monitor?ref=rss&format=simple&link=link)

No comments