Recent Posts

Breaking News

Gilas adunay gisugyoy alang ni Slaughter


KINAHANGLAN unang klaruhon ni Fil-Am Greg Slaughter ang iyang sitwasyon sa Brgy. Ginebra Gin Kings una kini maghunahuna nga moduwa og balik sa Gilas Pilipinas.

Mao kini ang gisugyot ni Samahang Basketbol ng Pilipinas (SBP) program director Tab Baldwin ngadto kang Slaughter human mibalik sa nasod ang 7-footer nga higante gikan sa walo ka mga buwan nga pag-training sa Amerika.

“Greg is working through his discussions with Ginebra and we respect that process,” matod ni Baldwin sa interbyu sa Spin.ph.

Si Slaughter milarga sa Amerika human naangkon sa Gin Kings ang titulo sa 2019 Philippine Basketball Association (PBA) Governors’ Cup niadtong Enero, ning tuiga. Pagkahuman sa 2019 Governor’s Cup, nahuman na sab ang kontrata ni Slaughter sa Gin Kings.

Wala’y kasayuran ang Gin Kings sa paglarga ni Slaughter sa Amerika, kinsa mipirma og kontrata sa inilang basketball agent sa kalibutan nga si Misko Raznatovic s BeoBasket, kinsa maoy agent ni Denver Nuggets All-Star center Nikola Jokic sa National Basketball Association (NBA).

Gituohan nga nalain si Slaughter sa Gin Kings gumikan sa hugonhugon nga plano siyang i-trade sa labing iladong basketball team sa Pilipinas.

Gusto sa Gilas Pilipinas nga sulbaron una ni Slaughter ang isyu kabahin sa iyang sitwasyon sa Gin Kings una kini mohimo’g lakang nga makasulod og balik sa national team.

Si Slaughter, kinsa produkto sa University of the Visayas (UV) Green Lancers, usa sa mga magduduwa nga posibleng kuhaon sa Gilas Pilipinas alang sa 2021 Fiba Asia Cup qualifiers nga ipahigayon karong Nobiyembre, 2020.

Gipasabot ni Baldwin nga dako ang poruhan nga masulod si Slaughter sa national team hilabi na ning panahuna nga naglisod sila pagporma og usa ka puwersa.

Apan gitataw ni Baldwin nga maghuwat pa sila nga mahan-ay ni Slaughter ang sitwasyon niini sa Ginebra.

“We are waiting until that is completed,” padayag ni Baldwin. (ESL)


Source: Sun.Star Superbalita (https://www.sunstar.com.ph/article/1872812/Superbalita-Cebu/Balita/Gilas-adunay-gisugyoy-alang-ni-Slaughter?ref=rss&format=simple&link=link)

No comments