Recent Posts

Breaking News

Firetruck sa barangay naatrasan sa truck


NIPILIT sa paril ang firetruck sa Barangay Ibabao-Estancia human naatrasan sa 30-footer nga truck van alas 10:17 sa buntag, Oktubre 23, 2020, sa D.M.Cortes St., Barangay Umapad, Mandaue City.

Matod ni Arnold Malig-on, operations head sa Traffic Enforcement Agency of Mandaue (Team) nga ang 30-footer truck nagbiyahe sa D.M Cortes St. diin naa sa luyo niini ang firetruck.

Misuway og U-turn ang truck van paingon sa U.N. Avenue, apan wala mabantayi sa driver niini nga nagsunod ang fire truck ug pag-atras niini aron makalubag, naatrasan ang fire truck diin napiit na sa paril.

Sa tan-aw ni Malig-on, nikalit lang og lubag kining truck ug wa mo-signal hinungdan nga wa sab makabantay ang driver sa firetruck hinungdan sa disgrasya.

Pahimangno ni Malig-on labi na sa mga driver sa mga truck nga kon sila mo-U turn, gikinahanglan sila nga mo-signal daan og inanay ang ilang paglubag aron sab aduna pay higayon nga makahunong o makalikay ang ubang mga motorista og sakyanan.

Matod ni Malig-on nga wa hinuoy naangol sa aksidente, apan napahak ang isig ka kilid sa firetruck.

Kon bahin sa teknikal, matod ni Malig-on, mamahimo ra nga maka-U turn sa dalan.

Ang disgrasya miresulta sa pag-traffic sa lugar sulod sa 30 minutos tungod kay ang 30-footer truck van nag-ali sa tibuok dalan ug ang mga motor lang ang mamahimong makaagi.

Human maabot ang Mandaue City Police traffic group, gidala ang mga sakyanan sa ilang opisina uban sa mga driver alang sa imbestigasyon. /


Source: Sun.Star Superbalita (https://www.sunstar.com.ph/article/1874497/Superbalita-Cebu/Balita/Firetruck-sa-barangay-naatrasan-sa-truck?ref=rss&format=simple&link=link)

No comments