Recent Posts

Breaking News

Estruktura sa hotel gipaguba sa Cebu City


ANG Cebu City Legal Office nipadala na og compliance order ngadto sa tagdumala sa White Knight Hotel sa General Maxilom Avenue aron tangtangon ang ilang mga haligi sa taytayan nga ilang gigamit pagtabok sa ilang propidad.

Ang mga haligi niini maoy gitumbok sa Siyudad nga hinungdan sa grabeng baha sa Gen. Maxilom Avenue niadtong Oktubre 13, 2020.

Si City Attorney Rey Gealon nihatag og 10 ka adlaw sa management sa hotel pagkuha sa columns aron di na masangit ang mga basura ug gapnod panahon sa kusog nga uwan.

Ang notisya gipadala sa City Legal Office niadtong Oktubre 27 ug gidawat ni Michael AƱero sa White Knight Hotel usa ka adlaw human sa gipatawag nga tigom ni Mayor Edgardo Labella tali sa 83 ka building owners nga gipahigayon sa Bayfront Hotel.

Gisuwayan og tawag ning pamantalaan ang ilang hotel, apan di makontak ang mga opisyal nga contact numbers nga ilang gihatag sa online.

Atol sa meeting, ang mga structure owners, apil ang maong hotel pinaagi sa ilang representante, nipadayag sa ilang dakong suporta ug kaandam motuman sa gustong mahitabo sa Siyudad. Si Labella niingon nga kon magmagahi sa pagsunod ang management, ang Siyudad di magduha-duha sa pagpasaka og kaso batok kanila.

Ang mayor niingon nga andam ang Siyudad pinaagi sa Department of Engineering and Public Works para mapadali ang pagkuha sa mga estruktra nga nakaali, apan dili mohatag og bayad ang Cebu City. / PAC


Source: Sun.Star Superbalita (https://www.sunstar.com.ph/article/1875252/Superbalita-Cebu/Balita/Estruktura-sa-hotel-gipaguba-sa-Cebu-City?ref=rss&format=simple&link=link)

No comments