Recent Posts

Breaking News

EOC mitala og labing ubos nga Covid-19 case sa Oktubre 25: 0.4%


NAKATALA og labing ubos nga daily positivity rate sa Covid-19 ang Cebu City niadtong Dominggo, Oktibre 25, sukad niadtong Marso ning tuiga.

Sa talaan sa Emergency Operation Center (EOC), niadtong Dominggo naka-swab sila og 487 ka indibiduwal ug 2 lang ang nagpositibo sa maong virus kun 0.4% ang natakboyan sa virus.

“By far the lowest positivity rate at 0.4 percent,” padayag ni Konsehal Joel Garganera, deputy chief implementer sa EOC.

Ang record sa EOC nagtug-an nga 9,332 ka mga natakboyan sa maong sakit ang nangaayo samtang 194 kanila ang pabilin nga nakigbugno sa maong sakit ug niabot na og 679 ka mga tawo ang nakutloan sa ilang kinabuhi.

Sa kinatibuk-an, ang Cebu City adunay 12.39% positivity rate sukad pa niadtong buwan sa Marso hangtod Oktubre 25.

Naobserbahan usab ni Garganera nga nga nagkaubos ang numero sa mga nangamatay sa maong virus.

Para sa buwan sa Oktubre, ang EOC nakatala lang og 6 ka mga tawo ang nakabsan sa ilang kinabuhi gumikan sa pakigbugno sa virus.

Gitug-an sa konsehal nga sa nilabay nga 14 ka adlaw, nag-anam og tibugsok ang infection rate diin 44 na ka barangay ang nagnegatibo sa Covid-19.

Ang EOC naghuwat nalang sa pag-abot sa 14 ka w diin adunay 96 nga paingon na ma-negatibo, buot ipasabot nga posible sunod semana wala na kaabot og 100 ang aktibong kaso sa Cebu City.

Si Mayor Edgardo Labella nipadayag nga mohatag ang City Government og tag P100,000 nga incentives ngadto sa mga barangay nga zero case sa Covid-19 gikan Nobyembre 1 hangtod Disyembre 31. (PAC)


Source: Sun.Star Superbalita (https://www.sunstar.com.ph/article/1874785/Superbalita-Cebu/Balita/EOC-mitala-og-labing-ubos-nga-Covid-19-case-sa-Oktubre-25-04?ref=rss&format=simple&link=link)

No comments