Recent Posts

Breaking News

DSWD mokuha og mga bag-ong 4Ps beneficiary sa di motapos ang 2020


MOKUHA ang Department of Social Welfare and Development (DSWD) og mga bag-ong benepisaryo ubos sa Pantawid Pamilyang Pilipino Program (4Ps).

Sa Central Visayas (CV), mokabat sa 6,670 ka panimalay ang gitarget nga masulod sa programa sa dili pa motapos ang tuig. Sa pagkakaron, dunay 279,943 ka household beneficiaries ang rehiyon.

Ang bag-ong 4Ps beneficiaries mohulip sa mga benepisaryo nga nibiya ug kadtong nakatapos na sa programa.

Nagsugod na ang DSWD Field Office VII sa validation process sa posibling masulod nga 4Ps beneficiaries.

Ang master list sa potensiyal nga maapil sa 4Ps beneficiaries gi-post sa daling makita sa barangay halls ug municipal halls aron makakomentaryo ang ilang kasilinganan kon angayan ba naa sa listahan.

Ang listahan sa potential beneficiaries gikan sa Listahanan database, diin resulta sa second round sa household assessment sa 2015.

Gawas sa pag-ila sa kabus gikan sa Listahanan, ang Pantawid household beneficiary kinahanglan nga dunay anak nga nasulod sa edad nga 0-18 o mabdos sa panahon sa assessment ug andam motuman sa mga kondisyon sa programa isip kabahin sa ilang responsibilidad.

Ang DSWD nag-awhag sa publiko sa pagtabang sa pag-validate o paghashas sa listahan sa benepisaryo aron insaktong pamilya ang matabangan sa programa.

Ang 4Ps usa ka programa sa nasudnong kagamhanan nga namuhonan sa maayong panglawas, nutrition ug edukasyon sa mga bata sa kabus nga pamilya.

Ubos kini sa pagpatuman sa DSWD, Department of Health (DoH) ug Department of Education (DepEd). (PR)


Source: Sun.Star Superbalita (https://www.sunstar.com.ph/article/1873113/Superbalita-Cebu/Balita/DSWD-mokuha-og-mga-bag-ong-4Ps-beneficiary-sa-di-motapos-ang-2020?ref=rss&format=simple&link=link)

No comments