Recent Posts

Breaking News

Drug lord sa CV giatake sa bilibid prison, patay


NAKURAT ang hepe sa Police Regional Office (PRO) 7 sa balita nga namatay sulod sa New Bilibid Prison sa Muntinlupa si Rustico Ygot, giila nga lider sa drug syndicate nga nagpadagan sa Central Visayas (CV) kini human giatake sa kasingkasing.

Si Ygot ang tag-iya niadtong 6 kilos sa gituohang shabu nga nasakmit sa Talamban ug Pardo Police Station sa Barangay Inayawan sa dakbayan sa Sugbo nga mokantidad og P40 milyunes lakip na ang 7 kilos sa Barangay Guadalupe.

Matod ni Police Brigadier General Albert Ignatius Ferro, dako og epekto ang pagkamatay ni Ygot tungod kay siya man ang labing dako nga drug supplier sa tibuok rehiyon 7.

“It will somehow criple the Ygot drug group because he is the standing leader. So, with that, if there’s no more leader, its really hard to conduct further drug operations,” matod ni Ferro sa iyang press conference.

Sa nakuha nga impormasyon ni Ferro nga si Ygot, samtang naa kini sa sulod sa Bureau of Correction, gihimong sinaligan sa Golden triad sa pag-supply sa ilegal nga drugas sa Visayas Region.

Sa miaging tuig, nadakpan sa Cebu City Police Office (CCPO) ug Consolacion Police Station ang sinaligan ug iyang live-in partner nga si Jocelyn Encila nga nakuhaan og kapin sa 20 ka kilo sa gituohang shabu.

Tungod sa kamatayon ni Ygot, dako ang posibilidad matod ni Ferro, nga si Encila na usab ang mohulip niini ilabi na nga nasayod na siya kinsa ang iyang miyembro sa gaway sa ilang ilegal nga negosyo.

“That’s a big possibility,. It's like a family business when the head of the family is no more to command that particular family, then the next in line might be the live-in partner...” dugang ni Ferro sa Superbalita Cebu.

Tungod niini, ang kapulisan sa Sugbo wala mohunong sa pagpaniid sa mga durugista nga nagtinguha nga mopalusot sa illegal nga drugas diin ang ilang kontak naa sa sulod sa mga bilanggoang lokal ug nasyonal. (AYB)


Source: Sun.Star Superbalita (https://www.sunstar.com.ph/article/1873226/Superbalita-Cebu/Balita/Drug-lord-sa-CV-giatake-sa-bilibid-prison-patay?ref=rss&format=simple&link=link)

No comments