Recent Posts

Breaking News

DPWH mitugyan sa mga pasilidad sa Covid-19


Gitugyan na sa Department of Public Works and Highways (DPWH) 7 ngadto sa Cebu City Government ang P125 milyones nga balor sa proyekto alang sa pagpakigbatok sa coronavirus disease 2019 (Covid)-19 sa North Reclamation Area, Oktubre 23,2020.

Ang pasilidad gilangkuban sa unom ka estruktura nga gikopya gikan sa container van ug adunay tag 16 ka kwarto nga kumpleto sa kahimanan balor og P84 milyunes, isolation facility para sa Covid patients sa Cebu City Quarantine Center balor og P13 milyones ug P28 milyones nga off-site dormitories para sa medical personnel.

Si Mayor Edgardo Labella maoy nidawat sa yawe gikan ni DPWH Regional Director Edgar Tabacon atol ceremonial turnover NRA sa dakayan.

“To our beloved President Rodrigo Duterte, DPWH Secretary Villar, Regional Director Edgar Trovela, daghan kaayong salamat. Among gisaad kaninyo kining inyong gasa nga gihatag sa mga molupyo sa daskbayan sa Sugbo labi na sa mga frontliner, amo kining ampingan kay kini may kahulogan sa atong panagtinabangay para sa kaayohan natong tanan,” matod ni Labella.

Ang pangulo sa Cebu City Quarantine Center nga si Yvonne Cania kinsa maoy administrator sa Cebu City Medical Center (CCMC) nagkanayon nga ang maong pasilidad maoy temporaryong puy-an sa mga medical health worker labi na sa mga nag-alagad sa CCMC ug isolation center para sa ipaubos sa quarantine balor og 14 ka adlaw.

Matod ni Cania nga ang matag room, adunay double deck bed, hot and cold shower, comfort room, adunay labhanan ug lutoanan.

Sa pagtugyan sa DPWH 7 sa maong pasilidad nga moatiman og kapin o kulang 150 ka mga tawo, si Labella nihatag usab og gahom ngadto kang Cania pagdumala niini kinsa maoy niumol sa mga guidelines para sa mga makabenepisyo sa maong off-site dormitories diin prayoridad niini ang medical personnel gikan sa CCMC. / KFD


Source: Sun.Star Superbalita (https://www.sunstar.com.ph/article/1874510/Superbalita-Cebu/Balita/DPWH-mitugyan-sa-mga-pasilidad-sa-Covid-19?ref=rss&format=simple&link=link)

No comments