Recent Posts

Breaking News

College instructor sikop sa buy-bust


PALOMPON, Leyte - Nasikop sa kapulisan ang usa ka college instructor sa anti illegal drugs operation sa Lunes, Oktubre 5, 2020.

Ang operasyon gilusad sa Municipal Drug Enforcement Unit uban sa Provincial Drug Enforcement Unit ug Philippine Drug Enforcement Agency (PDEA) sa Barangay Cantandoy, alas 10 sa buntag sa Lunes.

Giila ang suspek nga si Daryll Capuras, 28, instructor sa usa ka publikong tunghaan, taga Barangay Taberna ning lungsod.

Base sa report sa kapulisan, daghan na sila og impormasyon nga nadawat nga nalambigit ang maestro sa ilegal nga kalihukan. Gipanid-an sa kapulisan ang suspek kon unsa kini ka tinuod ug gisuwayan sa pagpalit.

Usa ka poseur buyer ang nakig transaksyon kang Capuras ug positibo kini nga napalitan og lima ka pakete sa gituhoang shabu sa kantidad nga P4,000.

Sa pagrekisa sa iyang lawas, nakuhaan pa siya og laing lima ka pakete sa gituhoang shabu ug ang marked money nga gigamit. (JKDP)


Source: Sun.Star Superbalita (https://www.sunstar.com.ph/article/1872674/Superbalita-Cebu/Balita/College-instructor-sikop-sa-buy-bust?ref=rss&format=simple&link=link)

No comments