Recent Posts

Breaking News

‘Clamping Ordinance’ sa Talisay sugdan karon adlawa


SUGOD karong adlawa, Oktubre 14, ibalik sa pagpatuman ang Clamping Ordinance niadtong illegally parked nga mga sakyanan sa dakbayan sa Talisay.

Kini maoy gipahibawo sa hepe sa City of Talisay-Traffic Operations and Development Authority (CT-TODA ), Jonathan Tumulak, tungod sa nagkahuot nga dagan sa trapiko resulta sa mga naka-obstruct nga illegally parked nga mga sakyanan daplin sa dalan.

Karong adlawa maoy bisperas sa kapistahan sa Talisay City sa ilang patron nga Santa Teresa de Avila.

Nasayran nga na-undang ang pagpatuman sa pag-clamp sa mga sakyanan atol niadtong lockdown diin menos sab ang mga sakyanan nga gitugotan nga makabiyahe.

Apan dihang gilugakan ang restrictions, inanay sab nga mibalik ang ka huot sa dalan hinungdan nga nahukman sa kagamhanan ang pagbalik sa pagpatuman sa maong ordinansa.

Gisugdan na sa miaging semana ang pagpakatap sa naasoyng impormasyon aron mahibawo ang publiko sa maong lakang sa pagpatuman pag-usab sa clamping.

Dugang pa ni Tumulak nga ilang hatagan og higayon ang tag-iya sa sakyanan nga makabiya sa no parking area pinaagi sa pagpahimangno niini, sa dili pa taoran og wheel clamp apan kadtong abandon vehicle siguradong maga-id.

Gi-awhag ang mga Talisaynon sa ilang kooperasyon pinaagi sa pag-report sa ilang buhatan kon adunay maatlan nga mga sakyanan nga nagpataka lang og park aron ilang ma-respondihan. Kadtong makalapas dunay multa nga P500 subay sa nalatid sa ilang ordinansa. (ANV, BBT)


Source: Sun.Star Superbalita (https://www.sunstar.com.ph/article/1873341/Superbalita-Cebu/Balita/Clamping-Ordinance-sa-Talisay-sugdan-karon-adlawa?ref=rss&format=simple&link=link)

No comments