Recent Posts

Breaking News

Ceres buses ‘di haum sa siyudad’


Taliwa sa sunodsunod nga mga aksidente nga nalambigitan sa mga Ceres bus sa Metro Cebu, gituohan nga di haum ang ilang dagkong mga sakyanan sa hagip-ot nga mga dan sa Metro Cebu.

Sukad niadtong Dominggo, Oktubre 26, dihang nagbangga ang usa ka Ceres bus ug ambulansya sa North Reclamation Area sa Dakbayan sa Sugbo, diin duha ang nangamatay, ang lain nilang mga bus nangalambigit sa menor nga mga aksidente sa dan ning nakalabay nga mga adlaw.

Usa ka adlaw human sa aksidente, usa sa ilang mga bus nakasaghid og sakyanan nga apil sa panon sa mga naghatod og lubong sa Dakbayan sa Sugbo.

Niadtong Huwebes, Oktubre 29, ang usa sa ilang mga bus nakasaghid og usa ka pickup truck sa Dakbayan sa Mandaue.

Sa dakbayan sa Mandaue gihapon sa Biyernes, Oktubre 30, nakaligis patay ang lain nilang bus og usa ka security guard nga nagbiseklita.

Tungod sa mga aksidente, si Atty. Jamaal Calipayan, pangu sa Team ug City Administrator sa Mandaue, mopatawag og usa ka meeting sa management sa Vallacar Transit.

Matod niya nga posible nilang hisgotan ang pagdisiplina sa ilang mga driver. Nipaambit si Calipayan nga usa sab siya ka biktima sa reckless driving sa mga driver sa Ceres bus.

Nagbisikleta siya ug nihunong ang Ceres bus sa di bus stop ug wa mosinyas nga moadaplin hinungdan nga hapit siya maigo sa bus. Dugang niya nga ang mga bus nga dagko di angay nga modagan sa kadalanan sa dakbayan tungod

kay ang mga dalan sa syudad wa gidesinyo nga agian niini. Tungod sa mga disgrasya, mohangop ang Dakbayan og investors sa modern jeepney nga gustong modagan sa dakbayan sa Mandaue aron nga mabalik na ang mga bus sa ilang mga rota sa probinsya.

NALIGSAN

Ang security guard nga naligsan sa Ceres bus human nasaghiran sa corner M.C.Briones St. ug sa U.N. Avenue, alas 12:20 sa udto sa Biyernes giilang si Sandy Ursal, 45, taga Sitio Kagay, Borbon, Cebu. (Video sa hitabo makita sa Facebook page sa Superbalita Cebu.)

Matod ni Arnold Malig-on, operations head sa Traffic Enforcement Agency of Mandaue (Team), nga ang duha nagbyahe gikan sa M.C Briones St. paingon labang sa Cebu North Road.

Sa nakuha sa CCTV, nakita nga ang bisikleta nagdagan sa tuong bahin, nag-una sa Ceres bus ug dihang naapsan, nasaghiran kini duol sa center island diin nahimutang ang outpost sa Team. Matod ni Malig-on nga ang traffic enforcer nila sa lugar nga nakasaksi sab sa disgrasya daling mipahibawo sa command center aron mopatawag og ambulansya.

Daling miresponde ang mga kawani sa Mandaue City Disaster Risk Reduction and Management sa lugar. Sa pakighinabi ni Malig-on sa mga nakaresponde, wa nay panimuot si Ursal ug pagdala niini sa Mandaue City Hospital didto na gideklarar nga dead on arrival. Gisikop sa Mandaue City Police Traffic Group ang driver sa Ceres bus nga si Jerito Cabahug, 39, taga Bogo City, Cebu.

Human nahibaw-an sa asawa ni Ursal ang hitabo, matod ni Police Staff Sergeant Ruven Dayon, field investigator sa kaso, nibisita kini sa ilang opisina alang sa ilang imbestigasyon.

Human niini, giimbitaran sa management sa Vallacar Transit, nagdumala sa Ceres Bus, ang asawa ngadto sa ilang opisina, matod ni Dayon.


Source: Sun.Star Superbalita (https://www.sunstar.com.ph/article/1875253/Superbalita-Cebu/Balita/Ceres-buses-di-haum-sa-siyudad?ref=rss&format=simple&link=link)

No comments