Recent Posts

Breaking News

Cebu City curfew gimub-an


GIKUNHORAN ni Cebu City Mayor Edgardo Labella ang curfew hours sa Dakbayan sa Sugbo sugod sa Lunes, Oktubre 5, 2020.

Apan usa ra hinuon ka oras ang gikibhang sa mayor.

Si Labella nagkanayon nga gikan sa kanhi alas 10 sa gabii, karon alas 11:00 na magsugod apan hangtod gihapon sa alas 5:00 sa buntag. Ang mayor nibutyag nga kini aron paghatag og igong panahon sa mga tawo nga makapalit sa ilang gustong paliton ug makauli pa sa ilang pinuy-anan ang mga trabahante nga di maapeke sa curfew.

“Duna naman tay 24 hours nga restaurant. Usa pa, the CCCI sent us a letter and I find the logic and reason because some establishments, when they close, there is no enough time. So, ato tagaan ug ato i-extend og dyutay ang oras,” padayag ni Labella.

Una niini, ang Cebu Chamber of Commerce and Industry (CCCI) nihangyo kang Labella nga kon mahimo, ihisama sa Mandaue City nga himuong alas 11 sa gabii magsugod ang curfew.

Sa miaging semana, gikunhoran usab ni Mandaue City Mayor Jonas Cortes ang oras sa curfew, gikan sa alas 10 sa gabii ngadto sa alas 5 sa buntag ngadto na sa alas 11 sa gabii hangtod sa alas 4 sa kaadlawon.

Si Labella nitugot sa 24 oras nga food ug medicine delivery human nilambo ang sitwasyon sa coronavirus disease (Covid-19) sa dakbayan ug nituman na sa minimum health protocol ang mga tawo. Sa nanglabay nga mga adlaw, kasagaran naa na lang sa single digit ang magpositibo sa Sars-CoV-2, kagaw nga maoy nagdala sa Covid-19.

Sa miaging semana, gilibkas usab ni Labella ang liquor ban, apan gidili gihapon ang pag-inom sa public, open spaces.

Ang mga hotel ug ubang mga establisemento nga dunay lisensya sa pagpamaligya og ilimnong makahubog gitugtan nang makabaligya, apan kinahanglan naa ra sa sud ang moinom.

Ang Siyudad sa Sugbo naa na sa modified general community quarantine (MGCQ), labing lugak sa tanang quarantine level, sukad sa Septiyembre 1 hangtod pa sa Oktubre 31.


Source: Sun.Star Superbalita (https://www.sunstar.com.ph/article/1872464/Superbalita-Cebu/Balita/Cebu-City-curfew-gimub-an?ref=rss&format=simple&link=link)

No comments