Recent Posts

Breaking News

Brutal ang pagpatay base sa autopsy


BRUTAL ang pagpatay sa tulo sa upat ka mga lalaki nga napalgan nga gipanglubong sa Sitio Bago, Barangay Cogon, Compostela niadtong Martes, Oktubre 6, 2020.

Ang tulo pulos dunay daghang mga samad dinunggaban sa nagkadaiyang bahin sa lawas samtang di na matino giunsa pagpatay ang ikaupat kay nadugta na ang lawas kay mas dugay ug una siyang gilubong.

Usa kanila giila sa iyang pamilya nga si Elmer Cañeda Enanoria, 20, construction worker, taga Mighty Villa, Barangay Bulacao Pardo, dakbayan sa Sugbo.

Si Enanoria napriso niadtong May 2019 tungod sa illegal drugs, apan nakagawas niadtong Mayo 2020.

Sa autopsy sa PNP Crime Laboratory 7 sa Oktubre 7, 2020 nga gihimo ni Dr. Benjamin Lara, si Enanoria nakaangkon og 16 ka mga samad dinunggaban sa lawas, lima niini sa liog.

Si Captain Vincent Zozobrado, hepe sa Compostela Police Station nga nahinabi sa Superbalita Cebu, nagkanayon nga kini maoy gipahibawo kaniya ni Lara. Tanang mga samad ni Enanoria makapatay, labina ang lima nga naa sa liog.

Giklaro niini nga makamatay ang 16 ka samad dinungaban, diin lima sa liog, apan wala gulgula.

Si Zozobrado nibutyag nga gawas sa iyaan ni Enanoria, ang inahan niini nga si Elena niila sa iyang anak sa iyang pagduaw sa punerarya sa Miyerkules sa udto.

Sayo sa buntag sa samang adlaw, unang giila si Enanoria sa iyang iyaan nga si Christy Cañeda Banilad, 34, minyo taga Brgy. Looc, Dakbayan sa Danao. Nailhan kini tungod sa tulo ka mga tattoo sa dughan, sa buko-buko nga markang “Batman” ug tuong bukton nga isdang “Koi”.

Matod ni Zozobrado nga ang inahan nibutyag nga ang iyang anak katapusan niyang nakit-an sa Septiyembre 25, sa alas 6 sa gabii sa ilang balay.

Gibutyag sab ni Elena nga ang iyang anak dunay kasong illegal nga drugas sa Regional Trial Court (RTC7) Branch 76 sa dakbayan sa Naga.

Ang iyang anak nabilanggo sa Naga City Jail niadtong Mayo 7, 2019, unya nakagawas sa prisuhan Mayo 12, 2020.

AUTOPSY

Bisan sa uwan, nahinayon gihapon ang pag-autopsy sa laing tulo ka mga lawas sulod sa public cemetery sa lungsod sa Compostela kay nibunok sab ang kusog nga uwan.

Si Zozobrado nibutyag nga ang ikaduhang biktima dunay tulo ka mga samad dinunggaban sa iyang liog, duha sa lawas, usa ka kinudlitan nga samad sa liog.

Ang lawas dunay tattoo sa likod nga Alimar ug laing tattoo nga BC45 (Batang Cebu 45) sa lawas ug letter M, Entra.

Ang ikatulong biktima way patik, apan dunay walo ka mga samad dinunggaban sa lawas, usa sa bitiis.

Ang ika-upat nga biktima di na maklaro unsay namatyan kay nadugta na ang lawas.

Matod ni Zozobrado nga ang tulo ka mga biktima nga dunay mga samad dinunggaban tulo ngadto sa lima ka mga adlaw na nga patay ug gidungan sa paglubong.

Ang ika-upat mga lima ngadto sa unom na ka adlaw ug una kini nga gilubong, sumala pa sa pamahayag ni Lara.

DRUGAS

Si Zozobrado niingon nga drugas ang motibo nga ilang gisubay. Matod ni Zozobrado nga si Elena niangkon kanila nga magsigeg suyop gihapon ang iyang anak human makagawas sa prisohan.

Gani niadtong gabii sa wala pa mahanaw iyang anak, gisugo kinig tawo pagpalit og shabu. Wa siya makaila sa tawo nga nisugo sa iyang anak.

“Mireklamo daw tong nagsugo niya kay gamay ra daw ang bahig sa iyang napalit nga shabu, ipabalik daw. Unya mibalibad ang biktima kay kuyaw madakpan siya kay naay daghang checkpoints ug hamag,” dugang ni Zozobrado.

Samtang mibutyag sab ang inahan nga ang tawo nga katapusan naestorya sa iyang anak ilang nahibaw-an nga nadakpan sa kaso sa ilegal nga drugas.

Wa isalikway ni Zozobrado nga posibling nag-unay ang grupo sa biktima, kabahin sa ilang padagan sa drugas, o dunay mitambling nila. Naglaum silang mahimo kining yawe sa pagsulbad sa pagpatay.

SAKSI GIIMBESTIGAR

Wa pay matumbok ang kapulisan sa Probinsya sa Sugbo kinsa ang nipatay ug nilubong sa upat. Matod ni Police Colonel Aladdin Collado, kasamtangan nga hepe sa Cebu Provincial Police Office, nga wa pa silay saksi sa insidente gawas sa nakadiskobre sa lubong. (Dugang taho ni AYB)


Source: Sun.Star Superbalita (https://www.sunstar.com.ph/article/1872683/Superbalita-Cebu/Balita/Brutal-ang-pagpatay-base-sa-autopsy?ref=rss&format=simple&link=link)

No comments