Recent Posts

Breaking News

Basement sa hotel nasunog; P300K danyos


Basement sa usa ka hotel sa Cebu City uptown area nasunog mga alas 7 pasado sa buntag sa Huwebes, Oktubre 15, 2020.

Wa pa hinuon mahibaw-i sa Cebu City Fire Department kon unsay hinungdan sa pagkasunog sa White Knight Hotel Cebu, kanhi Mango Park Hotel, sa General Maxilom avenue.

Matod ni FO2 Emerson Arceo, imbestigador, nga ang sunog mga alas 7 pasado miulbo, apan natawgan sila mga pasado alas 8 na sa buntag.

Sa ilang pag-abot, naglisod sila sa pagsulod sa nahimutangan sa kayo tungod sa ka baga sa aso.

Nigamit sila og breathing apparatus aron makaabot sila sa sulod sa basement nga giabangan og usa ka telecom company ug nahimutangan usab sa IT Department sa hotel ug uban pa.

Napawong ang kayo mga alas 10:22 sa buntag ug nibilin og gibana-banang danyos nga P300,000.

Matod ni Arceo nga posibleng electrial short circuit ang hinungdan, apan ila pang sutaon. (GPL)


Source: Sun.Star Superbalita (https://www.sunstar.com.ph/article/1873511/Superbalita-Cebu/Balita/Basement-sa-hotel-nasunog-P300K-danyos?ref=rss&format=simple&link=link)

No comments