Recent Posts

Breaking News

Bag-ong tulay tukoron sa Barangay Pulangbato


GIMANDUAN ni Mayor Edgardo Labella ang Department of Engineering and Public Works (DEPW) pagpadali sa ilang gihimo nga program of works and estimates ( POWE) sa pagatukoron nga taytayan sa barangay Pulangbato, dakbayan sa Sugbo.

Si Labella, nipahigayon og inspeksyon kagahapon, Oktubre 6 aron masusi ang maong taytayan nga gibanabanang natukod kapin 20 ka tuig nang nakalabay.

Nakita sa mayor nga gikaon na sa taya ang mga puthaw ug nabuslot na ang mga steel plate nga maoy agian sa mga sakyanan nga gihulagway ni Labella nga dili luwas ilabi na sa mga dagkong sakyanan nga mo-agi.

Buot ni Labella nga ma-aksyonan dayon sa DEPW inabagan sa Cebu City Disaster Risk Reduction and Management Office para mahatagan og kasigurohan ang libuan ka mga molupyo sa barangay Pulangbato nga nagsilbi usab nga agian sa mga residente sa barangay Guba.

Gumikan niini, wala na kini ipagamit sa mga 6-wheelers pataas nga sakyanan aron dili mahugno.

Si Engr. Lowel Corminal, OIC sa Officer of the Assistant City Engineer sa DEPW nagkanayon nga adunay P50 milyones nga pundo alang sa maong taytayan kansang pundo gikan sa City Government.

Giapil usab og susi ni Labella ang nakankan nga riprap duol sa kongretong taytayan sa barangay Guba gumikan sa grabeng baha nga nasinati tulo ka adlaw na ang nakalabay. (PAC)


Source: Sun.Star Superbalita (https://www.sunstar.com.ph/article/1872562/Superbalita-Cebu/Balita/Bag-ong-tulay-tukoron-sa-Barangay-Pulangbato?ref=rss&format=simple&link=link)

No comments