Recent Posts

Breaking News

Babaye dunay kiha batok sa pulis; maoy di gustong makigbuwag?


ANG police official nga nipusil patay sa iyang hinigugma ug naghikog pagkahuman dunay duha ka mga kasong rape nga giatubang nga gipasaka sa babaye pipila ka mga buwan ang nakalabay.

Si Talisay City police chief Major Gerard Ace Pelare nibutyag nga nakigsulti kaniya si Police Lieutenant Fraxilo Albiso, 51, nga gipasakaan siya og duha ka mga kasong rape ni Vernice Cardino, 31.

Sa iyang nasabtan sa sulti ni Albiso kaniya nga gihimo kini sa babaye aron di siya mokalas sa ilang relasyon human nahilot sa police official ang ilang relasyon tali sa iyang asawa.

Wa siya makaseguro kon unsa ka tinuod ang gipanulti ni Albiso kay wa niya maestorya ang babaye, apan segurado siyang gihigugma na sa police official si Cardino.

Matod ni Pelare nga ilang gikonsiderar ang hitabo nga crime of passion.

Dunay duha ka mga saksi nga nitug-an nga ilang nakita ang pagsulod ni Cardino sa kwarter ni Albiso niadtong Martes sa buntag sa wa pa ang krimen.

Apan pipila ka oras ang nilabay, nakadungog na sila og upat ka buto sa armas de fuego.

Dali nga gisusi sa mga sakop ni Albiso nga anaa nakaestambay sa ibabaw sa building kon unsay nahitabo. Ilang naabtan ang duha nga nagbuy-od sa sawog ug gideklarar nga dead on arrival sa tambalanan.

Base sa ilang nakita, nagdumog ang duha sa wa pa ang pagpamusil base sa nagkatag nga mga butang.

“Posibleng wala na gyud siguro makaya ang sitwasyon hinungdan sa paghikog sa biktima,” matod ni Pelare.

APEKTADO SA PANDEMIC?

Samtang hepe sa kapulisan sa probinsya sa Sugbo di pa mopasira sa imbestigasyon.

Nimando si Cebu Police Provincial Office officer-in-charge Colonel Alladin Collado sa Talisay police station nga ipadayon ang imbestigasyon sa pagpusil patay ni Albiso sa iyang hinigugma sa wala pa siya magpusil usab sa kaugalingon.

Matod ni Collado nga bisan ang duha namatay ug wa nay makatug-an unsa ang hinungdan, mangita silag paagi nga matubag ang mga pangutana ug mapasabot ang kabanay ug publiko labot sa insidente.

“Though ganun ang patutungohan ngayon, pero we will conduct an investigation para mas malinawan po tayo doon sa nangyari,” matod ni Collado.

Usa sa ilang mga pagduda nganong nahimo ni Albiso ang pagpusil kang Cardino tungod sa problema ug sa nasinating pandemic nga miresulta sa di maayong desisyon sa kinabuhi.

Tungod sa hitabo, hingusgan pa ang mental intervention program sa kapulisan aron malikayan nga masubli ang nahitabo kang Albiso sa ubang mga police.

“Ito na yung sinasabi natin na maybe siguro problem at saka itong pandemic natin. So, we have to engage them with this kind of activities and trainings,” matod ni Collado.

Si police regional director Brigadier General Albert Ignatius Ferro nagkanayon nga ang kapulisan nagpahigayon sa ilang internal cleansing program, diin gidili ang immoral nga binuhatan sama sa pagpakigrelasyon sa mga babaye o lalake nga minyo na. (BBT, AYB)


Source: Sun.Star Superbalita (https://www.sunstar.com.ph/article/1874246/Superbalita-Cebu/Balita/Babaye-dunay-kiha-batok-sa-pulis-maoy-di-gustong-makigbuwag?ref=rss&format=simple&link=link)

No comments