Recent Posts

Breaking News

Ayuman: 16 ra ka brgy. nakasumiter sa BDRRM plan


NAPAKYAS pag-submit sa ilang Barangay Disaster Risk Reduction Management (BDRRM) plan ang 64 ka mga barangay sa dakbayan sa Sugbo para sa tuig 2021.

Kini ang gipahibawo ni Ramil Ayuman, pangulo sa Cebu City Disaster Risk Reduction and Management Office (CCDRRMO), human sa Septiyembre 30 deadline.

Si Ayuman nagkanayon nga 16 lang ka barangay ang nakakumpleto sa ilang dokumento ug sagad kanila bukirang barangay.

Kini mao ang mga Barangay Adlaon, Agsungot, Budlaan, Cambinocot, Ermita, Hipodromo, Kalubihan, Mabini, Paril, San roque, Tejero, Tinago, Kinasang an, Labangon, Pamutan ug Barangay Binaliw.

Ang pangulo sa CCDRRMO niawhag ngadto sa mga barangay kapitan sa 64 ka barangay sa pagduso sa ilang DRRM nga dili molapas sa Nobyembre 15 nga maoy iyang gihatag nga extension.

Si Kapitan Clifford NiƱal sa San Nicolas Proper niingon nga iyang ipasusi sa barangay secretary ang mga dokumento bahin sa ilang BDRRM ug nipasalig nga ila kining iduso sa mosunod nga semana.

Iyang gipadayag matag tuig sila moduso sa BDRRM apan nalangay ang ilang pagkumpleto niini gumikan usab sa pandemic dala sa Covid-19 sanglit apektado ang operasyon sa ilang barangay.

Kini sab ang rason ni Kapitan Daido “Jojo” Abcede sa Barangay San Antonio sanglit kahibawo sila sa negatibong impact sa ilang barangay kon dili sila maka-submit.

Si Ayuman nagkanayon nga ang napakyas sa BDRRM plan, hayan dili aprobahan ang annual budget sa ilang tagsatagsa ka barangay. (PAC)


Source: Sun.Star Superbalita (https://www.sunstar.com.ph/article/1874218/Superbalita-Cebu/Balita/Ayuman-16-ra-ka-brgy-nakasumiter-sa-BDRRM-plan?ref=rss&format=simple&link=link)

No comments