Recent Posts

Breaking News

Atsa nabale pagtigbas, mag-uuma naangol ra; suspek nagselos sa kapuyo kay 'paraygon'


MAG-UUMA nga nag-alintabo ang kasuko samtang nagsud-ong sa iyang kapuyo ug silingan nga “lambing” nga nag-estoryahanay, nanigbas niadtong Sabado alas 11 sa gabii, Oktubre 24, 2020 sa sityo Banahaw, Barangay Mainit, Oslob, Sugbo.

Suwerte ang iyang gitigbas kay nabali ang atsa, igo rang nasamad ang ulo nga maoy iyang gihapsan.

Ang biktima giilang si Jomar Labiste, 30, mag-uuma dunay kapuyo sa nahisgutang lugar samdan sa ulo damtang nasikop ang suspek nga si Edimar Travera, 36, mag-uuma.

Si Police Staff Sergeant Jerwin Arago sa Oslob Police Station nga nahinabi sa Superbalita Cebu nagkanayon nga si Travera hubog kay nag-inom uban sa mga higala ug kabanay.

Niabot si Labiste nga gikan sab nag-inom uban sa mga higala.

Nihapit si Labiste sa balay ni Travera sa iyang pagpauli ug nitagay.

Paglabay sa mga oras, sila si Labiste ug kapuyo ni Travera nag-estoryahanay.

Dinhi na niulbo ang kasuko ni Travera kang Labiste dihang nagtupad na kini sa iyang kapuyo ug seryuso kaayo sa ilang panag-estorya.

“Naglalis sila, Sir, kay nasuko man ang suspetsado, nagselos siya kay lambing daw kaayo uban sa iyang kapuyo,” dugang ni Arago.

Tungod sa kalagot ni Travera, nikuha og atsa, gihapsan ang ulo ni Labiste hinungdan nga nawad-an kini og panimuot.

Nisibat si Travera samtang si Labiste gidala sa iyang mga higala sa ilang balay diin didto na naulian sa panimuot.

Gidali siya sa pagdala sa tambalanan ug gi-report sa kapulisan ang nahitabo hinungdan nga nadakpan si Travera.

Si Police Staff Sgt. Arago, niingon nga swerte si Labiste kay sa pag-atsa ni Travera nabale kini ang likod sa atsa; dili ang hait maoy nakaigo kay nabale pagtigbas.

Kasong frustrated homicide ang giandam sa kapulisan ang ipasaka batok kang Travera. (GPL)


Source: Sun.Star Superbalita (https://www.sunstar.com.ph/article/1874778/Superbalita-Cebu/Balita/Atsa-nabale-pagtigbas-mag-uuma-naangol-ra-suspek-nagselos-sa-kapuyo-kay-paraygon?ref=rss&format=simple&link=link)

No comments