Recent Posts

Breaking News

8 ka vendor, 3 sa traffic gi-Covid


MOABOT sa walo ka vendors ug tulo ka mga sakop sa City Traffic Management System (CTMS) ang positibo sa coronavirus disease (Covid-19) base sa labing uwahing resulta sa mga swab sample nga nadawat sa City Health Office sa dakbayan sa Lapu-Lapu.

Ang mga nagpositibo kabahin sa kapin sa 3,000 ka mga vendor ug personnel sa CTMS nga gipaubos sa libreng swab test sa kagamhanan ubos sa kamandoan ni Lapu-Lapu City Mayor Junard “Ahong” Chan niadtong Oktubre 19 hangtod 21.

Matod ni Grace Mary Carungay, epidemiological and surveillance unit officer sa kagamhanan nga aduna pay resulta sa 500 ka mga swab sample ang ilang gihuwat sa pagkakaron.

Gumikan kay moabot man sa 3,500 ang ilang napa swab.

Laing resulta nga ilang gihuwat mao ang resulta sa swab sample sa mga tricycle drayber sa isla sa Olango.

Ang tanang nagpositibo naa na sa isolation sa isolation center sa dakbayan samtang ang ilang mga closed contact, labi na mga kabanay, gipaubos na usab sa swab test ug kasamtangang nag-isolate usab samtang wa pay resulta.

Samtang ang nagnegatibo makapaninda na og padayon sa merkado publiko ug satellite market sa dakbayan.

“Nalipay gihapon ta nga bisag sa kadaghan nato nga gi swab, gamay ra ang nagpositibo. So, effective jud siguro ang ato mga gipangbuhat batok sa Covid-19,” matod ni Carungay.

Sa umaabot Oktubre 28, laing hugna sa libreng swab test ang ipahigayon sa mga vendor nga pasiugdahan sa kagamhanan.

Kini gumikan kay daghang mga vendor ang wa mapaubos sa swab test sa unang hugna gumikan sa kadaghan.

Mokabat sa 2,500 lang unta ang orihinal nga target sa City Health Office, apan nilapas ang nagpa swab nga mga vendor gumikan kay daghan usab ang nakauyon sa maong paagi.

Ang dili magpaubos sa swab nga vendor did-an nga makatinda sa mga merkado sa dakbayan.


Source: Sun.Star Superbalita (https://www.sunstar.com.ph/article/1874779/Superbalita-Cebu/Balita/8-ka-vendor-3-sa-traffic-gi-Covid?ref=rss&format=simple&link=link)

No comments