Recent Posts

Breaking News

8 ka toneladang manok gipangsunog


Gisunog na ang mga walo ka toneladang manok nga nasakmit sa Mandaue City Veterinary Office ngadto sa usa ka waste management facility sa Barangay Talamban, Cebu City, adlawng Biyernes, Oktubre 30, 2020.

Gisaksihan kini sa mga representante sa MCVO, National Meat Inspection Service, Food and Drugs Authority ug ang kompanya.

Sigon ni Dr. Karen Merilles, Mandaue City Veterinarian, nga thermal destruction ang proseso sa pag-dispose sa mga manok ug wala nay rason nga makuha pa kini og balik tungod abo na ang resulta niini.

Dugang niya nga ang maong proseso gibayaran sa disposal company.

Sa laing pakighinabi, si Dr. Eduardo Oblena, ang direktor sa National Meat Inspection Service, miingon nga kung ang usa produkto sa karne na-expire na kinahanglan kini nga i-destruct o ilabay sa lugar kung asa kini na expire ug dili na angay nga i-ship pa sa laing lugar.

Kini aron pagsiguro nga ang mga expired nga karne dili na mabalik sa merkado ug i-recycle.

Gituohang ang mga na-expired nga mga manok gikan sa inila nga food chain, mga sobra sa produksyon human wala mahalin dihang wala pa tugoti og abli ang mga kan-anan pagpaubos sa nasod sa community quarantine.

Matod ni Oblena nga tungod nga naka-produce na og mga manok alang sa “normal days” nila ang kompanya sa wala pa ang quarntine ug sa dihang nag-lockdown ang lalawigan hinungdan nga naabtan na kini sa expiry.

Kung ibaligya pa sa merkado ang maong mga produkto ang matag pack mabaligya og P200 ngadto sa P250 ug ang walo ka tonelada muabot kini og P4 milyones.

Sa laing bahin, bisan paman nga na-dispose na ang maong mga manok, padayon gihapon ang imbestigasyon sa maong kaso aron masubay kung unsa nga mga balaod ang nalapas sa maong kompanya, matod ni Merilles.

Kini aron makatabang sab nga mu-improve ang mga regulations nga iimplementar kabahin niini labi na sa mga cargo companies.

Giawhag sab ni Merilles ang publiko nga kung buot sila nga mupalit og karne adto gyud sa mga tindahan nga adunay meat inspection certificate aron masiguro nga kini limpyo ug luwas alang sa konsumidor.

Alang sa mga food chain, giklaro ni Merilles nga ang mga food chain mituman gyud sa mga standard sa pagdala sa pagkaon.

Apan sigon ni Merilles nga aduna lang mga pangutana nga angay tubagin sa imbestigasyon kalabot sa process flow sa disposal sa mga karne. / KFD


Source: Sun.Star Superbalita (https://www.sunstar.com.ph/article/1875255/Superbalita-Cebu/Balita/8-ka-toneladang-manok-gipangsunog?ref=rss&format=simple&link=link)

No comments