Recent Posts

Breaking News

44 ka barangay wa makatalag Covid sa 14 ka adlaw


ANG mga barangay sa Cebu City nga wa makatala og bag-ong mga kaso sa coronavirus disease 2019 (Covid-19) sa nakalabay nga 14 ka mga adlaw niabot og 44 sa Oktubre 23, 2020.

Ang Emergency Operations Center (EOC), hinuon niklaro nga kini sa ila lang na-test.

Ang Siyudad sa Sugbo dunay 80 ka mga barangay, nga nagkahulogan nga dunay nagpabiling 36 ka mga barangay nga dunay aktibong mga kaso.

Sa 44, upat sa mga barangay way higayon nga sila nakatala ug natakdan sa Covid-19.

Ning bag-o lang, si Mayor Edgardo Labella nipahibawo nga siya mohatag og P100,000 nga ganti sa mga barangay nga di makatala og Covid-19 gikan sa Nobiyembre 1 ngadto sa Disyembre 31.

Nagkalainlain ang mga reaksyon sa mga barangay kapitan.

Si Inayawan Barangay Captain Kirk Bryan Repollo nidawat sa hagit kay mao kini ang tumong sa barangay nga wagtangon ang infection.

Si Repollo, hinuon niingon nga ang barangays wa lang manginahanglan og incentives, inay, ang suporta sa Siyudad.

“However, the barangay would still need the support of the City Government, not just by way of incentives but a true support,” nagkanayon si Repollo.

Ang pagpukan sa Covid-19 infection mamahimo, matod ni Repollo, apan ang pulitika nagpabiling hagit.

Duna na lay usa ka aktibong kaso sa Covid-19 ang Inayawan.

Alang kang Labangon Barangay Captain Victor Buendia, bise presidente sa Association of Barangay Councils (ABC), ang hagit ni Labella “near to impossible (hapit imposible).”

Matod niya nga ang ka way gahom sa pagpatuman og mga lakang sa iyang barangay dako og papel ning mao nga hagit.

“We are not in full control to our barangay, sa Bisaya pa, dili mi pabuoton unsa among buhaton sa among barangay,” nagkanayon si Buendia.

Ang Labangon dunay tulo ka aktibong nagpabiling mga kaso.

Si Sambag 2 Barangay Captain Ryan Aznar niingon nga maayo kini nga hagit ni Labella kay sa iyang barangay kanunay silang nagmabinantayon aron di makakatap ang Covid-19.

“Even without the reward, we are always vigilant,” nagkanayon si Aznar.

Ang ganti nga gitanyag ni Labella maoy iyang tubag sa hagit ni Enviroment Secretary Roy Cimatu nga kab-uton ang pagwagtang sa aktibong mga kaso sa Covid-19.

Alang kang Labella makab-ot kini pinaagi sa tinabangay. (JJL)


Source: Sun.Star Superbalita (https://www.sunstar.com.ph/article/1874586/Superbalita-Cebu/Balita/44-ka-barangay-wa-makatalag-Covid-sa-14-ka-adlaw?ref=rss&format=simple&link=link)

No comments