Recent Posts

Breaking News

34 ka mga menor de edad, giluwas


MOABOT sa 34 ka mga menor de edad nga nagpangidaron og singko ngadto sa 17 anyos ang na-rescue sa mga sakop sa Task Force Kasaligan ug kapulisan sa siyudad sa Sugbo.

Ang maong mga batan-on nagduwa sud sa mga internet café ug nagduwa og basketball atol sa gilusad nga foot patrol ngadto sa mga dapit diin adunay taas ang kaso sa coronavirus disease.

Ang mga dapit nga gitutokan sa task force mao ang barangay Labangon, Mambaling, Lorega ug T. Padilla, siyudad sa Sugbo.

Samtang tulo usab ka basketball board ug ring lakip na ang tulo ka bola ang ilang gipang-imbargo aron dili una magamit sa mga batan-on ning panahon sa pandemic.

Matod ni Police Major Ardiolito Cabagnot, battalion commander sa Task Force Kasaligan nga gawas sa mga bata nga na-rescue nasikop sab ang duha ka batan-ong lalake nga nagdalag illegal nga drugas nga gibutang sa facemask.

Ang maong mga dinakpan nasikop sa barangay Mambaling niadtong Oktubre 5 sa dihang nagpatuman ang Task Force Kasaligan sa minimum health standard.

Sa dihang gipangayoan sa ilang quarantine pass kalit nga nahulog ang usa ka putos nga adunay sud nga gituohang shabu gikan sa facemask samtang ang laing lalake milabay sa iyang gigunitang droga.

Tungod sa nakuha nga illegal drugs girikisa dayon nila kini ug dugang unom ka putos sa gituohang shabu ug upat ka drug paraphernalia ang ilang nasakmit.

Ang maong mga batan-on giturn-over na sa police station uban ang Gender and Development sa barangay aron mapaubos sa pagsukit-sukit.

“Kining mga minors ato silang gi-rescue ug atong gipatawag ang mga ginikanan ani nila nya atong gipahimangno-an nga sunod og dili pa gyud nila mabantayan ang ilang mga bata sila na ang among file-lan og kaso,” matod ni Cabagnot.

Si Police Colonel Josefino Ligan ang hepe sa Cebu City Police Office nagkanayon nga nakasabot siya nga adunay mga bata nga mosulod sa internet café tungod sa pagsugod na sa virtual classes.

Apan dili mahimong biya-an lang sila sa ilang mga ginikanan sa sunod sa internetan tungod kay hugot pang gidili ang mga menor de edad sa paggawas sa ilang panimalay.

“Ang mga bata karon sa ilang online nga pag-eskwela dapat kung mo-adto man gani sa internet café naa ang guardian mobantay sa bata ug kadtong mga internetan i-implement pud ninyo ang social distancing,” matod ni Col. Josefino Ligan.

Mimando na si Ligan sa iyang mga chief of police nga susihon ang mga internet café sa mga sudlunong lugar sa barangay aron malikayan ang panagtakod sa virus. (AYB, GPL)


Source: Sun.Star Superbalita (https://www.sunstar.com.ph/article/1872563/Superbalita-Cebu/Balita/34-ka-mga-menor-de-edad-giluwas?ref=rss&format=simple&link=link)

No comments