Recent Posts

Breaking News

3 ka ‘distress call’ gitubag sa Coast Guard


TULO ka managlahing insidente sa kadagatan ang gi-respondehan sa Phillippine Coast Guard (PCG) 7 sa nakalabay nga duha ka adlaw tungod na usab kini sa bati nga panahon nga nasinati dala niining bagyong ‘Quinta’.

Sayo sa buntag, Lunes, Oktubre 26, dihang nakasugat og sunog ang MTUG Super Shuttle 3 sa kadagatan sa Shell Island, dakbayan sa Sugbo.

Base sa impormasyon sa PCG 7 gikan sa Ouano Wharf sa dakbayan sa Mandaue ang maong tugboat ug paingon unta sa Kawit Point, Cebu City.

Daw kalit lang nga mikayo ang engine room niini diin gisuwayan pa sa tripolante ang pagpawng niini apan wala makaya.

Alas 3 sa kaadlawon dihang miresponde ang barko sa Coast Guard District Central Visayas nga BRP Suluan (MRRV 4406).

Alas 4:30 na sa buntag dihang nadeklarar nga under control ang sunog.

Luwas ang lima ka tripolante nga sakay sa maong tugboat diin naglakip kini sa Kapitan nga si Aurelio Agac-ac, ug tripolante nga sila si Jeff Van Bowie Barrica - Able Seaman, Juanito Godinez - Chief Engineer, Arlou Diamilas - Oiler, ug Joseph Abraham - Oiler

Samtang luwas ang 10 ka pasahero sa motorbanca nga naglisod og dunggo sa kadagatan sa Lapu-Lapu City tungod sa kadagko sa bawod.

Ang MBCA Chester 1 aduna’y sakay nga 10 ka pasahero diin naglisod na kining og dunggo sa pantalan sa Marigondon niadtong Dominggo sa gabii, Oktubre 25.

Luwas hinuon ang tanang pasahero diin nasayran nga gikan kini nag-island hopping.

Matod sa Kapitan sa maong motorbanca Noel Pacaldo nga udto pa niadtong Dominggo dihang nag-island hopping sila gikan sa Olango paingon sa Marigondon, Lapu-Lapu City.

Alas 11 na sa gabii dihang na-rescue ang tanang pasahero diin naglakip kini nila ni Analiza Amazona, 50; Zenia Rikka Amazona, 29; Lizette Rose Amazona, 27; Junell Jundit Amazona, 23; Febby Jollyka Amazona, 22; Riche Alba Amazona, 22; James Kyle Amazona, 18; Kirk John Eturma, 18; Kyka Margaret Eturma, 14; ug Ray Gabriel Amazona, 14.

Samtang naluwas usab ang 14 ka tripolante sa MV The Good Fortune nga nakasugat kini og problema. (HBL)


Source: Sun.Star Superbalita (https://www.sunstar.com.ph/article/1874783/Superbalita-Cebu/Balita/3-ka-distress-call-gitubag-sa-Coast-Guard?ref=rss&format=simple&link=link)

No comments