Recent Posts

Breaking News

3 barangay gihasi's alimpulos


TACURONG CITY -- Nagpaabot na og inisyal nga hinabang ang lokal nga panggamhanan sa Palimbang sa Sultan Kudarat sa mga pamilya sa tulo ka mga barangay nga gikuso-kuso sa alimpulos o ipu-ipo alas 3:45 sa hapon niadtong Martes.

Sobrang kahadlok ug daw katapusan na sa kalibutan ang gibati sa mga molupyo sa nahisgutang barangay sa paghampas sa kalamidad.

Sa taho gikan sa Municipal Disaster Risk Reduction and Management Office (MDRRM) sa nahisgutang lungsod, mga barangay nga gitamparos sa alimpulos mao ang Milbuk, San Roque ug Libuan.

Saysay ni Renante Calzado, kinsa taga Barangay Milbuk, nga ilang nakita ang ipu-ipo nga namugna sa dagat.

Wala dangti og dugay, mibundak ang makusog nga ulan dungan sa ipu-ipo nga milampurnas sa ilang mga barangay.

Tungod sa kahadlok sa mga molupyo, nanagan sila ug nanago sa luwas nga lugar.

Giguba sa alimpulos ang mga kabalayan, gilarot ang mga punoan sa kahoy apil na mga lubi ug prutas, mga pananum sa mga mag-uuma sama sa saging, mais ug humay.

Suwerte na lang nga walay nasamdan sa nahisgutang kalamidad. (Edgar E. Fuerzas)


Source: Sun.Star Superbalita (https://www.sunstar.com.ph/article/1874984/Superbalita-Davao/Balita/3-barangay-gihasis-alimpulos?ref=rss&format=simple&link=link)

No comments