Recent Posts

Breaking News

22 bag-o nga kaso sa Covid natala sa Digos


DIGOS CITY -- Baynte dos ka mga bag-ong kaso sa coronavirus disease (Covid-19) ang nadugang sa talaan sa City Health Office (CHO) niadtong Miyerkules, Oktubre 14.

Gumikan niini, gikan 121 misipa na sa 144 ang kompirmadong kaso sa Covid-19 sa dakbayan ug sa maong ihap, 76 pa lang ang nakarekober.

Mokabat na sa 42 ang nadala sa nagkadaiyang tambalanan samtang aduna pa'y 47 suspek ug usa ka probable ang siyudad.

Segun sa CHO nga gipailawom sab sa strict home quarantine ang 146 ka indibiduwal ug laing 13 ang anaa sa isolation unit.

Sa profiling sa CHO, ang ika-102 nga pasyente naka-close contact sa iyang 60 anyos nga asawa, ug uban pang sakop sa pamilya sanglit nagpuyo lamang sila sa usa ka balay.

Aduna sab 54 anyos nga babayeng frontliner ang apil nag-positibo human nga naka-contact og pasyente nga nataptan sa Covid-19.

Laing nag-positibo mao ang 32-anyos nga lalaking nagtrabaho sa record section sa usa sa mga tunghaan sa dakbayan ug nag-part time job isip consultant sa computer programs sa usa ka pribadong ospital sa Davao del Sur.

Ang pasyente way laing travel history gawas sa pagtambong sa trabaho ug pag-adto sa merkado publiko aron mamalit og konsumo sa panimalay.

Sa maong ihap, nataptan sab ang 60-anyos nga tag-iya og gamay'ng karenderya sa dakbayan diin siya mismo ang nagaluto ug naga-pamalengke sa merkado.

Hinuon, anaa sa nagkadaiyang ospital ang mga nag-positibo ug sagad kanila pulos asymptomatic.

Mihimo na ang CHO og contact tracing sa mga nataptan sa kagaw.

Sa maong sitwasiyon, subling miapela si Mayor Josef Cagas sa tanang Digosenues nga doblehon ang pag-amping ug motuman gyud sa minimum health protocols sama sa pagsul-ob og face mask, face shield ug kanunay nga paglimpyo sa kalawasan kay dako kini og ikatabang nga mahilayo sa kagaw.

Samtang gihangop sab sa mayor nga nahimong "negatibo" ang resulta sa iyang swab test niadtong Oktubre 10, ilabi na nga matag adlaw niining ginahimo ang iyang trabaho palibot sa dakbayan. (Orlando B. Dinoy)


Source: Sun.Star Superbalita (https://www.sunstar.com.ph/article/1873550/Superbalita-Davao/Balita/22-bag-o-nga-kaso-sa-Covid-natala-sa-Digos?ref=rss&format=simple&link=link)

No comments