Recent Posts

Breaking News

2 natodas sa ambush


KIDAPAWAN CITY -- Blangko pa ang kapulisan sa Pikit Municipal Police Station sa North Cotabato sa motibo sa pagpamanhig kon diin duha ka mga tawo ang namatay alas 6:25 sa gabii, Miyerkules, Oktubre 28.

Giila ang mga biktima nga sila Jomar Mustapha, 30, minyo, walay trabaho, nagpuyo sa Barangay Fort Pikit ug Ali Wahab, 20, ulitawo, molupyo sa Barangay Macabual sa maong lungsod.

Gibutyag ni Pikit Chief of Police Captain Mautin Pangandigan nga sakay og motorsiklo ang mga biktima sa Barangay Batulawan apan gipamusil sa wala mailhing mga armadong lalaki gamit ang M16 Armalite rifles ug kalibre .45 nga pistola.

Patay diha dayon ang mga biktima human matusak-tusak ang ilang lawas sa mga bala samtang mga armado miikyas paingon sa hilit nga dapit sa Pikit.

Walay nakaila sa mga molupyo sa mga armado gumikan didto nila giatngan ang mga biktima sa ngitngit nga bahin sa kalsada ug nag-ulan niadtong tungura. (Edgar E. Fuerzas)


Source: Sun.Star Superbalita (https://www.sunstar.com.ph/article/1875065/Superbalita-Davao/Balita/2-natodas-sa-ambush?ref=rss&format=simple&link=link)

No comments