Recent Posts

Breaking News

2 ka imananan gi-raid; 36 dakpan


MOABOT sa 36 ka mga tawo nadakpan, lakip na ang duha ka tag-iya sa usa ka night club sa Barangay Kasambagan, Siyudad sa Sugbo, atol sa pag-roving sa mga sakop sa Cebu City Police Office sa Biyernes sa gabii, Oktubre 9, 2020.

Duha ka mga dapit ang ilang girumbo sa mao nga gabii.

Unang giadto sa mga pulis nga gipangulohan ni Police Colonel Josefino Ligan, officer-in-charge sa kapulisan sa siyudad sa Sugbo, ang usa ka bar sa barangay Kasambagan.

Ilang naabtan ang 27 ka mga tawo nga nag-inom.

Sa mga nangadakpan, 15 mga lalake ug 12 mga babaye, walo niini mga langyaw. Lakip na ang tag-iya sa establisemento ilang giapil sa pagsikop.

Pasabot ni Ligan nga ang kagamhanan sa Dakbayan sa Sugbo wa pa motugot sa mga balay kahilayan sama sa imnanan nga makaabli tungod sa padayong hulga sa coronavirus pandemic.

Bugtong mga kan-anan lang ang mahimong makadawat og customer ug mahimong makapainom, apan nag limit sa duha lang ka mga botelya.

GIRONDA

Pagka alas 11:20 sa gabii, gisunod dayon nila ang usa ka imnanan nga nahimutang sa Barangay Busay, bukirang dapit sa siyudad sa Sugbo.

Kalapasan sa Article 151 sa Revised Penal Code ang ipasaka batok sa mga dinakpan tungod sa wala pag tuman sa executive order ni Labella labot sa minimum health standard ug curfew ordinance.

Tungod sa maong hitabo, moduso og report si Ligan ngadto sa buhatan ni Labella alang sa pagpa revoke sa business permit sa Trademark bar nga naa nahimutang sa Governor M. Cuenco Avenue, Barangay Kasambagan, nga maoy una nilang gironda.

“We will be making a report, addressed to the City Government for penalty or going towards the revocation of their business permit. That is a blatant disregard of the executive order of the mayor and a clear violation. So, we will be recommending for the closure of that establishment,” matod ni Ligan.

Dugang ni Ligan nga ang ilang gihimo maoy paghatag og warning sa ubang mga establisemento nga wa motuman sa mando sa Kagamhanan sa Siyudad sa Sugbo.

VIDEOKE

Samtang sukad nga mipagawas og executive order si Labella sa pagdili sa videoke panahon sa adlawan, wa pay nadakpan ang kapulisan sa siyudad nga milapas niini.

Nibahad si Ligan nga ilang higpit nga ipatuman ang anti noise ordinance tungod sa pagsugod na sa online classes sa mga bata nga naa lang sa sulod sa ilang balay nagtuon.

Sukad sa milabay nga adlaw, gimandoan ni Ligan ang Task Force Kasaligan sa pag-roving, apan wa pay naabtan sa mga residente sa kabarangayan.

Gawas sa pagdili sa videoke ug pagsaba-saba sa ilang lugar gikan sa Lunes hangtod sa Biyernes, ila usab nga ipatuman ang no drinking daplin sa karsada.


Source: Sun.Star Superbalita (https://www.sunstar.com.ph/article/1873052/Superbalita-Cebu/Balita/2-ka-imananan-gi-raid-36-dakpan?ref=rss&format=simple&link=link)

No comments