Recent Posts

Breaking News

2 ka bata giluwas gikan sa baha sa Paknaan


Duha ka mga bata ang nangaluwas, usa niini naangol, sa pagbaha sa Barangay Paknaan, Dakbayan sa Mandaue niadtong Dominggo sa udto, Oktubre 4, 2020.

Tubig uwan gikan sa bukirang bahin sa siyudad ug pagtaob sa dagat maoy gibasol sa lapas tawo nga giladmon sa baha sa Barangay Paknaan.

Usa ka bata nga gibana-banang nagpangedarog 3-5 anyos ngadto nakaangkon og lima ngadto sa walo ka pulgada nga samad sa walang lapa-lapa human makatamak og bildo atol sa pagbakwit nila sa ilang balay.

Si Benedict Todtod, responder sa Mandaue City Disaster Risk Reduction Management Office (CDRRMO), kinsa mao ang miresponde sa pakitabang sa pamilya sa bata, niingon atol sa pakighinabi sa Superbalita Cebu nga gisung-ay ang bata sa amahan samtang ang inahan nangayo og pakitabang nila kay ang tiil sa iyang anak nahutdan na og dugo.

Sa iyang pagsusi sa samad, nakita ni Todtod nga gihigtan og guma ang tiil sa bata hinungdan nga wala na kini magdugo.

Matod ni Todtod nga kon wala matabang dayon ang bata, posible nga maputol ang tiil tungod sa hugot nga paghigot sa guma.

Gidala ang bata sa Mandaue City Hospital ug didto gitambalan.

Laing insidente sab ang nahitabo sa Sitio Kalubihan, diin adunay 12 anyos nga batang lalake nga naanod sa sulog sa baha human kini milayat gikan sa punoan sa usa ka kahoy tungod sa karatol niini.

Dali dayon kining gi-rescue sa mga responder ug giitsahan og salbabida aron makapadaplin.

Gidala sab ang bata sa Mandaue City Hospital. (KFD)


Source: Sun.Star Superbalita (https://www.sunstar.com.ph/article/1872398/Superbalita-Cebu/Balita/2-ka-bata-giluwas-gikan-sa-baha-sa-Paknaan?ref=rss&format=simple&link=link)

No comments