Recent Posts

Breaking News

170 ka libod suroy sa Cebu City, gi-rescue


NIABOT og 170 ka mga tawo nga anha magkatuldanan sa mga aseras ang na-rescue sa hiniusang operasyon sa Cebu City Government sa Oktubre 20, 2020.

Kini human gilusad sa Cebu City Anti Mendicancy Office, Prevention Restoration Order Beautification Enhancement (PROBE) Department of Social Welfare and Services (DSWS) Cebu City’s Environmental and Sanitation Team (Ceset) ug Cebu City Police Office ang ilang ikaduhang surpresa nga operasyon paghawan sa mga sidewalk gikan sa mga libud suroy.

Si Razel Cuizon, public information officer (PIO) sa City Government, nagkanayon nga gidala ang mga na-rescue sa halfway house nga nahimutang sa North Reclamation Area samtang gipahigayon pa ang profiling sa DSWS.

Ang task force nilibot sa downtown ug midtown areas sugod kagahapon sa kadlawon, Oktubre 20, ug gipamukaw ang mga nahinanok sa pagkatulog nga mga individual.

Sagad kanila anha mopahiluna sa mga balisbisan sa mga edepisyo o sa sidewalks.

PANGINABUHIAN

Si Mayor Edgardo Labella mimando sa task force nga hipuson ang maong mga tawo sanglit iyang naobserbahan nga nag-anam na kini og kadaghan samtang nagkaduol na ang Pasko, diin sagad kanila magpakilimos.

Ang mga individual nga adunay balay dinhi sa siyudad papaulion samtang kadtong taga lalawigan sa Sugbo ihatod sa ilang tagsa-tagsa ka lungsod.

Ang gustong makat-on sa livelihood program iindosar ngadto sa Department of Manpower Development and Placement (DMDP) para adunay makamaohan nga panginabuhian.

Gihangyo usab ni Labella ang simbahang Katoliko nga maoy maghatagan og pagkaon sa mga homeless nga abisohan ang ilang mga benepisyaryo nga di paistambayon daplin sa karsada ug dasigon para mopauli sa ilang pinuy-anan.

Sa unang operasyon sa task force sa miaging semana, naka-rescue sila og 152 ka mga individual. Mayoriya kanila gipapauli kay adunay mga balay, apan adunay pipila kanila ang gitug-an ni Cuizon nga subling ma-rescue sa ikaduhang operasyon.


Source: Sun.Star Superbalita (https://www.sunstar.com.ph/article/1874115/Superbalita-Cebu/Balita/170-ka-libod-suroy-sa-Cebu-City-gi-rescue?ref=rss&format=simple&link=link)

No comments